Gandhimathi Balan : പഞ്ചവടിപ്പാലം സിനിമയുടെ നിർമാതാവ് ഗാന്ധിമതി ബാലൻ അന്തരിച്ചു

തിരുവനന്തപുരം : ക്ലാസിക് ചിത്രങ്ങളായ പഞ്ചവടിപ്പാലം, തൂവാനത്തുമ്പികളടക്കമുള്ള മലയാള സിനിമ ക്ലാസിക്കുകളുടെ നിർമാതാവ് ഗാന്ധിമതി ബാലൻ അന്തരിച്ചു. തിരുവനന്തപുരം സ്വകാര്യ ആശുപത്രിയിൽ ചികിത്സിയിലിരിക്കെയാണ് 65കാരനായ ഗാന്ധിമതി ബാലന്റെ മരണം. മലയാളത്തിലെ പ്രമുഖ സംവിധായകന്മാരായ കെ ജി ജോർജ്, വേണു നാഗവല്ലി, പത്മരാജൻ, ബാലചന്ദ്ര മേനോൻ, ജെ ശശികുമാർ, ജോഷി തുടങ്ങിവരുടെ നിരവധി ചിത്രങ്ങൾ ബാലൻ നിർമിച്ചിട്ടുണ്ട്. നിർമാതാവിന് പുറമെ തിയറ്റർ ഉടമയും കൂടിയായിരുന്നു ബാലൻ.

ബാലചന്ദ്രൻ മേനോന്റെ ഇത്തിരി നേരം ഒത്തിരി കാര്യം എന്ന സിനിമയിലൂടെ നിർമാതാവായ ഗാന്ധിമതി ബാലൻ പിന്നീട് കെ.ജി ജോർജിന്റെ ആദാമിന്റെ വാരിയെല്ല്, പഞ്ചവടിപ്പാലം, പത്മരാജന്റെ മൂന്നാം പക്കം, തൂവാനത്തുമ്പികൾ, നൊമ്പരത്തി പൂവ്, വേണു നാഗവള്ളിയുടെ സുഖമോ ദേവി ഭദ്രൻ ഒരുക്കിയ മാളൂട്ടി തുടങ്ങി 30 ഓളം സിനിമകളുടെ നിർമാണവും വിതരണ ചുമതലയും നിർവഹിച്ചു. 1990ൽ ഇറങ്ങിയ ഈ തണുത്ത വെളുപ്പാൻ കാലത്ത് ആണ് ഗാന്ധിമതി ബാലൻ അവസാനമായി പ്രവൃത്തിച്ച ചിത്രം. 

പത്മരാജന്റെ മരണത്തിന് ശേഷമാണ് ബാലൻ മലയാള സിനിമ നിർമാണ രംഗത്ത് നിന്നും വിട്ടുമാറിയത്. തിരുവനന്തപുരത്ത് പ്രവർത്തച്ചിരുന്നു ധന്യ, രമ്യ തിയറ്ററുകളുടെ ഉടമയും കൂടിയായിരുന്നു ബാലൻ. പത്തനംതിട്ട ഇലന്തൂർ സ്വദേശിയാണ് ബാലൻ. ദീർഘനാളായ തിരുവനന്തപുരത്ത് കുടുംബത്തോടെ താമസിച്ചുവരുന്നു. അനിത ബാലനാണ് ഭാര്യ. മക്കൾ- സൗമ്യ ബാലൻ, അനന്ത പത്മനാഭൻ.