Sumathi Valavu: ഹൊറർ സിനിമയുമായി മാളികപ്പുറം ടീം; `സുമതി വളവ്` പുതിയ ചിത്രം

മാളികപ്പുറം എന്ന ചിത്രത്തിന് ശേഷം അഭിലാഷ് പിള്ളയും വിഷ്ണു ശശി ശങ്കറും വീണ്ടും ഒന്നിക്കുന്നു. സുമതി വളവ് എന്നാണ് ചിത്രത്തിന് പേരിട്ടിരിക്കുന്നത്. അർജുൻ അശോകൻ ആണ് ഈ ചിത്രത്തിൽ നായകനായി എത്തുന്നത്. അഭിലാഷ് പിള്ള തിരക്കഥയൊരുക്കി വിഷ്ണു ശശി ശങ്കർ ചിത്രം സംവിധാനം ചെയ്യുന്നു. മുരളി കുന്നുംപുറത്ത് ആണ് ചിത്രം നിർമ്മിക്കുന്നത്. ദിനേഷ് പുരുഷോത്തമനാണ് ചിത്രത്തിന്റെ ഛായാ​ഗ്രാഹകൻ. 

ചിത്രത്തിന്റെ സൗണ്ട് ഡിസൈനർ എം.ആർ രാജകൃഷ്ണൻ ആണ്. എഡിറ്റർ- ഷഫീക്ക് മുഹമ്മദ് അലി, ആർട്- അജയ് മങ്ങാട്ട് എന്നിവരാണ്. ചിത്രത്തിലെ അഭിനേതാക്കളെ സംബന്ധിച്ചുള്ള വിവരങ്ങൾ വരും ദിവസങ്ങളിൽ പുറത്തുവിട്ടേക്കും. 'ഭയപ്പെടുത്തുന്ന സവാരിക്ക് തയ്യാറായിക്കോളൂ' എന്നാണ് ചിത്രത്തിന്‍റെ ടാഗ് ലൈന്‍.

തിരുവനന്തപുരം നെടുമങ്ങാട് എന്ന സ്ഥലത്തെ മൈലുംമൂടെന്ന മലയോര ഗ്രാമത്തിലെ ഒരു വളവിന്റെ പേരാണ് സുമതി വളവ്. ഇവിടെ അപകടങ്ങൾ പതിവായിരുന്നു. ഇവിടെ കൊലചെയ്യപ്പെട്ട സുമതി എന്ന സ്ത്രീയുടെ ആത്മാവ് അലയുന്നു എന്നാണ് കഥ. ഒരു കാലത്ത് രാത്രി സമയങ്ങളിൽ ഇവിടെ യാത്ര ചെയ്യാൻ ഭയപ്പെട്ടിരുന്നു. ഈ വളവും അതിനെ ചുറ്റിപ്പറ്റി പ്രചരിച്ച കഥയും ആണോ ചിത്രം പറയുന്നത് അതോ വേറെ കഥയാണോ എന്നത് വ്യക്തമല്ല.