Kuwait: പ്രവേശനവിലക്ക് നീക്കുന്നു, വാക്സിന്‍ എടുത്തവര്‍ക്ക് ഓഗസ്റ്റ് ഒന്ന് മുതല്‍ പ്രവേശനം
പ്രവാസികളുടെ നീണ്ട കാത്തിരിപ്പിന് വിരാമമായി, കോവിഡ് വ്യാപനത്തെത്തു‌ടര്‍ന്ന് ഇന്ത്യയുള്‍പ്പെടെയുള്ള രാജ്യങ്ങള്‍ക്ക് ഏര്‍പ്പെടുത്തിയ പ്രവേശന വിലക്ക് നീക്കാന്‍ തീരുമാനമെടുത്ത് കുവൈറ്റ്.
Kuwait City: പ്രവാസികളുടെ നീണ്ട കാത്തിരിപ്പിന് വിരാമമായി, കോവിഡ് വ്യാപനത്തെത്തു‌ടര്‍ന്ന് ഇന്ത്യയുള്‍പ്പെടെയുള്ള രാജ്യങ്ങള്‍ക്ക് ഏര്‍പ്പെടുത്തിയ പ്രവേശന വിലക്ക് നീക്കാന്‍ തീരുമാനമെടുത്ത് കുവൈറ്റ്.
നിബന്ധനകളോടെയാണ് പ്രവേശനം. കുവൈറ്റ് (Kuwait)നിര്‍ദ്ദേശിച്ചിട്ടുള്ള വാക്സിന്‍ സ്വീകരിച്ചവര്‍ക്കും താമസ വിസയുള്ള വിദേശികള്‍ക്കുമാണ് പ്രവേശനം അനുവദിക്കുന്നത്. കൂടാതെ, പി.സി.ആര്‍ പരിശോധനയില്‍ കോവിഡ് മുക്തനാണെന്ന് തെളിയിക്കുകയും വേണം.
ഓഗസ്റ്റ് 1 മുതലാണ്‌ പ്രവേശനം അനുവദിക്കുക. കൊറോണ എമര്‍ജന്‍സി കമ്മിറ്റിയുടെ (Corona Emergency Committee) ശുപാര്‍ശ അംഗീകരിച്ചാണ് മന്ത്രിസഭാ തീരുമാനം. അവധിക്ക് നാട്ടില്‍ എത്തി സ്വദേശത്ത് കുടുങ്ങിപ്പോയ ആയിരങ്ങള്‍ക്ക് ഈ തീരുമാനം പ്രയോജനം ചെയ്യും.
ഫൈസര്‍, ആസ്ട്രസെനക, മൊഡേണ, ജോണ്‍സണ്‍ ആന്‍ഡ് ജോണ്‍സണ്‍ എന്നീ വാക്സിനുകള്‍ക്കാണ് കുവൈറ്റ് അംഗീകാരം നല്‍കിയിരിയ്ക്കുന്നത്. ഈ വാക്സിന്‍റെ രണ്ടു ഡോസും എടുത്തവര്‍ക്കാണ് പ്രവേശനാനുമതി ലഭിക്കുക.
അതേസമയം, ഭാരത് ബയോടെക്കിന്‍റെ കൊവാക്‌സിന് കുവൈറ്റ് അംഗീകാരം നല്‍കിയിട്ടില്ല. ഈ വാക്സിന്‍ എടുത്തവര്‍ക്ക് കുവൈറ്റിലേക്ക് പ്രവേശിക്കാന്‍ അനുമതി ലഭിക്കില്ല. എന്നാല്‍, കോവിഷീല്‍ഡ് എടുത്തവര്‍ക്ക് പ്രവേശനം ലഭിക്കും.
കൂടാതെ, കുവൈറ്റില്‍ വച്ച്‌ വാക്സിന്‍ സ്വീകരിച്ചവര്‍ക്ക് ഇനി രാജ്യത്തിന് പുറത്തേക്ക് യാത്രചെയ്യാനും തിരിച്ചുവരാനും സാധിക്കും. രാജ്യത്ത് നിലവിലുള്ള ആരോഗ്യ മാനദണ്ഡങ്ങള്‍ പാലിച്ചായിരിക്കണം യാത്ര എന്നുമാത്രം.
കോവിഡ് സൃഷ്ടിച്ച പ്രതിസന്ധിമൂലം ആശങ്കയില്‍ കഴിഞ്ഞിരുന്ന പ്രവാസികള്‍ക്ക് ആശ്വാസമേകുന്ന തീരുമാനമാണ് വ്യാഴാഴ്ച ചേര്‍ന്ന കുവൈറ്റ് മന്ത്രിസഭ കൈക്കൊണ്ടിരിയ്ക്കുന്നത്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...