Syrian President In Russia: അഭയം നൽകി റഷ്യ; സിറിയൻ പ്രസിഡന്‍റ് ബഷാർ അൽ അസദും കുടുംബവും മോസ്‌കോയിൽ

ദമാസ്ക്കസ്: സിറിയന്‍ പ്രസിഡന്‍റ് ബഷാര്‍ അല്‍ അസദും കുടുംബവും മോസ്‌കോയിയുണ്ടെന്ന് റിപ്പോർട്ട്.  അസദിനും കുടുംബത്തിനും റഷ്യ അഭയം നൽകിയെന്ന് ഔദ്യോഗിക റഷ്യൻ വാർത്താ ഏജൻസിയായ TASS റിപ്പോർട്ട് ചെയ്തിരിക്കുന്നത്. 

ബഷാർ അൽ അസദ് സിറിയ വിട്ടെന്ന് റഷ്യ നേരത്തെ സ്ഥിരീകരിച്ചിരുന്നു എങ്കിലും എവിടെയാണെന്ന് വ്യക്തമല്ലായിരുന്നു. മാനുഷിക പരിഗണന കണക്കിലെടുത്താണ് റഷ്യ അഭയം നൽകിയത് എന്നാണ് റിപ്പോർട്ട്.  ഇതോടെ അസദും കുടുംബവും എവിടെ എന്ന കാര്യത്തിലെ ദുരൂഹത അവസാനിച്ചിരിക്കുകയാണ്.

ദമാസ്കസിൽ നിന്നും ഇന്നലെ പുലർച്ചെയാണ് ആസാദ് വിമാനം കയറിയത്. ഇതിനു പിന്നാലെ ആസാദ് രാജയം വിട്ടതായി സ്ഥിരീകരിച്ചു കൊണ്ട് റഷ്യ എത്തിയിരുന്നു.  ഭരണം വിമതർ പിടിച്ചതിന് പിന്നാലെ സമാധാനപരമായ അധികാര കൈമാറ്റത്തിന് ശേഷമാണ് ആസാദ് രാജയത്തെ വിട്ടതെന്ന് റഷ്യൻ വിദേശകാര്യ മന്ത്രാലയം വ്യക്തമാക്കിയിരുന്നു.  

സിറിയയിലെ റഷ്യയുടെ സൈനിക താവളങ്ങളിൽ അതീവ ജാഗ്രതാ നിർദേശം നൽകിയിട്ടുണ്ടെന്നും എന്നാൽ നിലവിൽ ഗുരുതരമായ ഭീഷണിയൊന്നും ഇല്ലെന്നുമാണ് റിപ്പോർട്ട്.   ഇതിനിടയിൽ ഭരണം പിടിച്ചടക്കിയ എച്ച് ടി എസിനെയും സിറിയൻ ജനതയെയും  താലിബാൻ അഭിനന്ദിച്ചു. 
പ്രതീക്ഷിച്ചതിലും വേഗത്തിലാണ് സിറിയൻ തലസ്ഥാനമായ ദമാസ്‌കസും വിമത സായുധ സംഘം പിടിച്ചെടുത്തത്. അബു മുഹമ്മദ്‌ അൽ ജുലാനിയാണ് അസദിന്റെ ഏകാധിപത്യ ഭരണം അവസാനിപ്പിച്ച് സിറിയയിൽ ഇനി ഭരണത്തിലേറുന്നത്. ജൂലാനി അമേരിക്ക തലയ്ക്ക് 10 കോടി വിലയിട്ട കൊടുംഭീകരനായിരുന്നു.  പ്രസിഡൻറ്  രാജ്യം വിട്ടതോടെ തെരുവിലിറങ്ങിയ ജനം പതിറ്റാണ്ടുകളായി തല ഉയർത്തി നിന്ന ബഷാർ അൽ അസദിന്റെ പ്രതിമകൾ തകർത്തെറിഞ്ഞു. സിറിയൻ സൈന്യവും സുരക്ഷാ സേനയും ദമാസ്കസ് രാജ്യാന്തര വിമാനത്താവളം ഉപേക്ഷിച്ചു പോയി. പലസ്ഥലത്തും ജയിലുകൾ തകർത്ത വിമതർ തടവുകാരെ കൂട്ടത്തോടെ മോചിപ്പിക്കുകയുമുണ്ടായി. 

ഇന്നലെ തലസ്ഥാനമായ ഡമാസ്‌കസിന്റെ നിയന്ത്രണം പിടിച്ചതോടെയാണ് 24 വർഷത്തെ അസദ് ഭരണം അവസാനിപ്പിച്ചതായി വിമതസൈന്യം പ്രഖ്യാപിച്ചത്.  ഇതോടെ 74 ശതമാനം സുന്നി മുസ്ലിങ്ങളും 13 ശതമാനം ഷിയാക്കളും പത്ത് ശതമാനം ക്രൈസ്തവരും ഉള്ള ഒരു രാജ്യത്തിൻ്റെ ഭരണ നേതൃത്വം ഭീകര ബന്ധമുള്ള സായുധ സംഘത്തിന്റെ കൈകളിൽ എത്തുമ്പോൾ എന്താകും സിറിയയുടെ ഭാവി എന്ന ആശങ്ക ഏറുകയാണ്.