ऐकताय ना.... तुम्ही राहताय ते ठिकाण ठरवणार तुमचं आयुष्य, कसं ते पाहा

तुमचा परिसर तुमचं आयुष्य ठरवतं

मुंबई : तुम्ही किती काळ जगाल हे तुम्ही कुठे राहता यावरही अवलंबून आहे. ब्रिटनमध्ये झालेल्या एका संशोधनात असे समोर आले आहे की पॉश भागात म्हणजेच, ज्या भागात श्रीमंत लोक राहतात त्या भागात लोक तुलनेने जास्त जगतात. वंचित भागात राहणारे लोक पॉश भागात राहणाऱ्या लोकांपेक्षा कमी आयुष्य जगतात, असे संशोधन अहवालात म्हटले आहे. इंग्लंडमधील गरीब भागात राहणाऱ्या लोकांबद्दलच्या संशोधनात असे म्हटले आहे की, त्यांची कोरोनाची शिकार होण्याची शक्यता इतर लोकांपेक्षा ४६ टक्के जास्त आहे.

स्वतःहून वय होतं कमी 

'द सन'च्या रिपोर्टनुसार, गरीब भागात राहणाऱ्या लोकांना आर्थिक, सामाजिक अशा अनेक प्रकारच्या समस्यांना तोंड द्यावे लागते. त्यामुळे त्यांच्या वयाची काही वर्षे आपोआपच कमी होतात. अहवालात, ब्रिटनमधील काही वंचित भागांचा संदर्भ देत, असे सांगण्यात आले आहे की तेथे राहणारे लोक श्रीमंत भागात राहणाऱ्या लोकांपेक्षा 7.5 वर्षे कमी जगतील.

किंबहुना, संशोधकांनी एक कॅल्क्युलेटर तयार केला आहे, ज्याद्वारे त्यांनी जन्मतारीख आणि लिंगाच्या आधारे सध्याच्या परिस्थितीत कोण जास्तीत जास्त काळ जगू शकते हे सांगण्याचा प्रयत्न केला आहे.

पुरूषांपेक्षा महिलांचं आयुष्य जास्त 

संशोधकांचे म्हणणे आहे की, यूकेमध्ये राहणाऱ्या 50 वर्षांच्या पुरुषांना 100 वर्षे वयापर्यंत पोहोचण्याची केवळ 4.4 टक्के शक्यता असते. परंतु महिलांसाठी ते 7.4% पर्यंत वाढते. त्याचप्रमाणे, या वर्षी जन्मलेल्या मुलींमध्ये शतक झळकावण्याची शक्यता 19 टक्के आहे, तर मुलांमध्ये हे प्रमाण केवळ 13.4 टक्के आहे.

या अहवालात असे म्हटले आहे की, महिला नेहमीच पुरुषांपेक्षा चांगले जगतात, परंतु दोघांच्या वयातील फरक सतत बदलत आहे. तथापि, लिंग अंतर 1970 ते 2019 पर्यंत 3.7 वर्षांनी कमी झाले आहे.

महिलांच्या जास्त आयुष्यात कारण महत्वाचं

या अहवालानुसार, धूम्रपान आणि हृदयविकारामुळे होणार्‍या मृत्यूचे प्रमाण कमी झाल्यामुळे पुरुषांमधील मृत्यूचे प्रमाण महिलांच्या तुलनेत वेगाने कमी होत आहे. परंतु 2020 पासून, लैंगिक अंतर लक्षणीयरीत्या वाढले आहे, कारण कोविड-19 मुळे महिलांपेक्षा पुरुष जास्त बळी पडत आहेत.

नर आणि मादी यांच्यातील गुणसूत्रांमधील फरक मृत्यू दरावर परिणाम करतात. याचा अर्थ मादी दीर्घकाळ जगण्यासाठी जैविक दृष्ट्या मजबूत असतात. याशिवाय धूम्रपानासारख्या इतर कारणांमुळेही पुरुषांचे वय कमी होते.