உடனடி கடன் கொடுக்கும் மோசடி கடன் செயலிகளுக்கு ஆப்பு வைத்த RBI: லிஸ்ட் ரெடி, நடவடிக்கை விரைவில்

RBI Update: உடனடியாக பணம் தரும் செயலிகள், அதாவது இன்ஸ்டன்ட் ஆப்ஸ் (Instant Apps) மூலம் கடன்களுக்கான ஆசை காட்டி ஏமாற்றுபவர்கள் மீது கடுமையான நடவடிக்கை எடுக்கும் முடிவில் அரசு உள்ளது. இது குறித்து தெரிவித்த இந்திய ரிசர்வ் வங்கி (Reserve Bank of India) கவர்னர் சக்திகாந்த தாஸ், கடன் வழங்கும் முன்னணி செயலிகளின் பட்டியலை மத்திய அரசுடன் ரிசர்வ் வங்கி பகிர்ந்துள்ளது என்றார். இந்தியன் எக்ஸ்பிரஸில் வெளியிடப்பட்ட செய்தியின்படி, பட்டியலில் பெயர் இல்லாத சட்டவிரோத கடன் செயலிகளுக்கு எதிராக தகவல் தொழில்நுட்ப அமைச்சகம் விரைவில் நடவடிக்கை எடுக்கும். சமீபத்தில், சமூக ஊடகங்கள் மூலம் தங்களை விளம்பரப்படுத்தி, உடனடி கடன் வழங்குவதாகக் கூறும் இதுபோன்ற கடன் பயன்பாடுகள் குறித்து அரசாங்கம் ஒரு எச்சரிக்கையை வெளியிட்டது.

சில கடன் செயலிகள் வாடிக்கையாளர்களை தவறாக வழிநடத்துகின்றன

கடன் செயலிகளால் வாடிக்கையாளர்கள் தவறாக வழிநடத்தப்பட்ட பல வழக்குகள் வெளிச்சத்திற்கு வந்துள்ளன. முன்னதாக பதிவு செய்யப்பட்ட கடன் பயன்பாடுகளின் பட்டியல் ரிசர்வ் வங்கியிடம் (RBI) இல்லை என்று அரசாங்கம் கூறியது. இது தவிர, எந்தெந்த ஆப்ஸ் நெகட்டிவ் லிஸ்டில் வருகின்றன என்ற பட்டியலும் அப்போது இல்லை. வியாழக்கிழமை ஒரு நிகழ்வில் பேசிய ரிசர்வ் வங்கி ஆளுநர் சக்திகாந்த தாஸ் (Shaktikanta Das), ரிசர்வ் வங்கி ஒழுங்குபடுத்தப்பட்ட நிறுவனங்கள், வங்கிகள் மற்றும் NBFCகளிடமிருந்து கடன் செயலிகளின் பட்டியலை சேகரித்து மின்னணு மற்றும் தகவல் தொழில்நுட்ப அமைச்சகத்திடம் கொடுத்ததாகக் கூறினார்.

நியாயமற்ற கடன் வழங்கும் செயலிகளில் சிக்கல்

தவறான வழியில் கடன்களை (Loans) வழங்கும் செயலிகள் மிகப்பெரிய பிரச்சனை என்றும் தாஸ் கூறினார். 'நாங்கள் ஏற்கனவே பட்டியலை அரசாங்கத்துடன் பகிர்ந்து கொண்டுள்ளோம். எந்த ஒரு பிரச்னை வந்தாலும், அரசுடன் பேசுவோம். ரிசர்வ் வங்கி மற்றும் தொடர்புடைய அமைச்சகங்கள் மற்றும் அரசாங்கத்தின் சட்ட அமலாக்க முகவர்கள் இடையே ஒருங்கிணைப்பு உள்ளது. நியாயமற்ற கடன் வழங்கும் பயன்பாடுகளுக்கு எதிராக நடவடிக்கை எடுக்க இந்த ஏஜென்சிகளுக்கு இடையே வழக்கமான சந்திப்புகள் நடத்தப்படுகின்றன.' என்று கூறினார். கடன் வழங்கும் செயலிகளின் (Loan Apps) பட்டியலை ரிசர்வ் வங்கி அனுப்பியுள்ளதாக தகவல் தொழில்நுட்ப அமைச்சகத்தின் மூத்த அதிகாரி ஒருவர் உறுதிப்படுத்தினார்.

சரியான முறையில் கடன் வழங்கும் செயலிகளின் பட்டியலை உருவாக்கும் பணியில் மத்திய வங்கி சில காலமாக செயல்பட்டு வருகிறது. ஆனால் இப்போது கடன் செயலிகளின் புதிய பட்டியல் அனுப்பப்பட்டுள்ளது. இது வங்கிகள் (Banks) மற்றும் NBFC கள் போன்ற பதிவு செய்யப்பட்ட நிறுவனங்களால் பயன்படுத்தப்படுகிறது. அதன் அடிப்படையில் இனி அடுத்த கட்ட நடவடிக்கை எடுக்கப்படும். கடந்த சில ஆண்டுகளில் டிஜிட்டல் கடன்களின் (Digital Loans) விரைவான அதிகரிப்பு காரணமாக, மோசடி வழக்குகள் வேகமாக அதிகரித்துள்ளன. இது குறித்து அதிகாரப்பூர்வ தகவல்கள் எதுவும் இல்லை. இந்தத் துறையுடன் தொடர்புடைய வல்லுநர்கள், தவறான கடன்களை வழங்கும் வணிகமானது குறைந்தபட்சம் 700-800 மில்லியன் டாலர் மதிப்புடையதாக இருக்கும் என்று மதிப்பிடுகின்றனர்.

இந்தியாவின் மத்திய வங்கியான ஆர்பிஐ, வங்கிச் செயல்முறைகளை எளிதாக்கவும், வாடிக்கையாளர்களின் வசதிகளை அதிகரிக்கவும், அவர்களது சேமிப்பையும், பணத்தையும் பாதுகாக்கவும் அவ்வப்போது பல புதிய விதிகளை அறிமுகம் செய்கிறது, பழைய விதிகளில் மாற்றங்களை செய்கிறது. கடன் செயலிகள் தொடர்பான இந்த செயல்முறையும் மக்கள் நலன் கருதி ஆர்பிஐ எடுத்துள்ள ஒரு மிகப்பெரிய நடவடிக்கையாகும்.

சார்பில்லாத சமரசமில்லாத செய்திகள் உங்கள் உள்ளங்கைகளில்! 

உடனுக்குடன் செய்திகளைத் தெரிந்து கொள்ளவும், உங்கள் கருத்துகளைப் பகிர்ந்து கொள்ளவும் சமூக வலைத்தளங்களில் எங்களைப் பின்தொடருங்கள்..

முகநூல் - @ZEETamilNews

ட்விட்டர் - @ZeeTamilNews

டெலிக்ராம் - https://t.me/ZeeTamilNews

வாட்ஸ்-அப் - https://whatsapp.com/channel/0029Va5XFvI90x2plF9cKY1r

அரசியல், கல்வி, பொழுதுபோக்கு, விளையாட்டு, சுகாதாரம், வாழ்க்கை முறை, சமூக, வேலைவாய்ப்பு என அனைத்து வகையான செய்திகளையும் தமிழில் பெற இப்போது ஜீ தமிழ் நியூஸ் செயலியைப் பதிவிறக்குங்கள்!!