'तांत्रिक बिघाडानं नाही तर इराणच्या हल्ल्यात कोसळलं युक्रेनचं विमान'

नवी दिल्ली : इराणची राजधानी तेहरानवरून उड्डाण घेतल्यानंतर काही वेळातच युक्रेनचं बोइंग ७३७ हे प्रवासी विमान जमिनीवर कोसळलं. बुधवारी घडलेल्या या विमान अपघातात १७६ नागरिक जागीच ठार झाले. यामध्ये ६३ कॅनडा नागरिक उपस्थित होते. हे विमान तांत्रिक बिघाडामुळे कोसळल्याचं म्हटलं जात होतं. परंतु, आता मात्र अमेरिकेच्या मित्रदेशाकडून याबाबत वेगळाच दावा केला गेलाय. इराणच्या मिसाइल हल्ल्यात विमान कोसळल्याचा दावा अमेरिकेशी जवळचे संबंध असलेल्या कॅनडानं केलाय. 

कॅनडाचे पंतप्रधान जस्टिन ट्रुडो यांनी हा दावा केलाय. आपल्याला मिळालेल्या गुप्त माहितीच्या आधारे आपण हा दावा करत असल्याचं ट्रु़डो यांनी सांगितलंय. इराणनं मात्र कॅनडाचा हा दावा फेटाळून लावलाय. कॅनडाकडे असेलली कोणतीही गुप्त रिपोर्ट सादर करण्याचं आवाहनचं इराणनं केलंय. 

दुसरीकडे, अमेरिकेचे राष्ट्राध्यक्ष डोनाल्ड ट्रम्प यांनीही इराणच्या मिसाइलनं युक्रेनचं विमान पाडल्याचा दावा केलाय. इराणनं हे सर्व दावे फेटाळून लावलेत. 

उल्लेखनीय म्हणजे, कोसळलेल्या विमानाचा ब्लॅक बॉक्स देण्याची मागणी युक्रेननं केली होती. परंतु, इराणनं हा ब्लॅक बॉक्स देण्यास नकार दिलाय. इराण रेड क्रिसेंट सोसायटीचे उपप्रमुख इब्राहिम ताजिक यांनी, दुर्घटनेच्या कारणांची चौकशी सुरू असल्याचं म्हटलंय. 

महत्त्वाचं म्हणजे, तेहरानमध्ये युक्रेनच्या दूतावासानंही इंजिनमध्ये झालेल्या बिघाडामुळे ही दुर्घटना घडल्याचं आणि त्याचा दशतवादाशी कोणताही संबंध नसल्याचं म्हटलंय.