Video: ગાંધીનગરમાં ઘોડી પર સવાર દલિત વરરાજાને ઝીંક્યા લાફા, કહ્યું- “તમારી મર્યાદામાં રહો, હદ ભૂલી ગયા?

Dalit Groom Assault Incident: ગુજરાતના ગાંધીનગરમાં ઘોડી પર સવાર વરરાજા પર હુમલાનો કિસ્સો પ્રકાશમાં આવ્યો છે. આરોપ છે કે અહીં ચાર યુવકોએ વરરાજા સાથે મારઝૂડ અને ગાળાગાળી કરી હતી, કારણ કે તે દલિત સમુદાયનો હતો. ત્યારબાદ વરરાજાને કારમાં જાન લઇને દુલ્હનના ઘરે જવું પડ્યું હતું. આ સમગ્ર મામલે વર પક્ષના લોકોએ નારાજગી વ્યક્ત કરી છે. પરિવારજનોએ પોલીસને ફોન કરીને જાણ કરી હતી, જે બાદ પોલીસ ઘટનાસ્થળે પહોંચી હતી અને આરોપીની ધરપકડ કરીને કેસ નોંધ્યો હતો.

આ સમગ્ર ઘટના પાટનગર ગાંધીનગર જિલ્લાના ચડસણા ગામમાં 12 ફેબ્રુઆરીએ બપોરે બની હતી. માણસા પોલીસ સ્ટેશનના એક અધિકારીએ આપેલી માહિતી અનુસાર, આ કેસમાં આરોપીઓ વિરુદ્ધ IPC અને એટ્રોસિટી એક્ટની અલગ-અલગ કલમો હેઠળ કેસ નોંધવામાં આવ્યો છે. આ અંગેની ફરિયાદ વરરાજાના પિતરાઈ ભાઈએ નોંધાવી હતી.

ફરિયાદ નોંધાવનાર ભાઈના જણાવ્યા અનુસાર 12મી ફેબ્રુઆરીની બપોરે આ લગ્ન વરઘોડામાં લગભગ 100 લોકો સામેલ થયા હતા. આ સમય દરમિયાન વરરાજા ઘોડી પર સવાર હતા, ત્યાં હાજર તમામ લોકો નાચતા-ગાતા હતા અને વરઘોડો કન્યાના ઘર તરફ લઈ જઇ રહ્યા હતા. આ દરમિયાન એક યુવક બાઇક પર આવ્યો હતો અને સીધો વરરાજા પાસે ગયો હતો. તે યુવકે ઘોડી પર બેઠેલા વરને નીચે ખેંચ્યો અને તેને થપ્પડ મારવા લાગ્યો.

કેસની માહિતી મળતાની સાથે જ પોલીસની ટીમ એક્શનમાં આવી ગઈ હતી અને ચારેય આરોપીઓની ધરપકડ કરી હતી. આ આરોપીઓના નામ શૈલેષ ઠાકોર, જયેશ ઠાકોર, સમીર ઠાકોર અને અશ્વિન ઠાકોર છે. તે તમામ પછાત વર્ગના છે. હાલ પોલીસે વિવિધ કલમો હેઠળ ગુનો નોંધી તપાસ શરૂ કરી છે.