રાજકોટમાં મેઘરાજાની ધમાકેદાર એન્ટ્રી, યાજ્ઞિક રોડ અને ગોંડલ રોડ પર પાણી ફરી વળ્યાં

રક્ષિત પંડ્યા/રાજકોટ :રાજકોટ શહેરમાં આજે વરસાદની ધમાકેદાર એન્ટ્રી થઈ છે. શહેરના તમામ વિસ્તારમાં સાર્વત્રિક વરસાદ નોંધાયો છે. સવારથી જ શહેરમાં કાળા ડિબાંગ વાદળો છવાયા હતા. યાજ્ઞિક રોડ, જવાહર રોડ, ગોંડલ રોડ, રિંગરોડ સહિતના રસ્તાઓ પર વરસાદી પાણી ફરી વળ્યાં છે. તો સાથે જ વરસાદ આવતા શહેરના વાતાવરણમાં ઠંડક પ્રસરી છે. આ ઉપરાંત રાજકોટના ગ્રામ્ય વિસ્તારોમાં પણ વરસાદ મન મૂકીને વરસ્યો છે.

રાજકોટ જિલ્લામાં ૧૦ વાગ્યા સુધીમાં 92 MM વરસાદ નોંધાયો 

• લોધિકા અને ગોંડલમાં 1 ઇંચ વરસાદ 
• રાજકોટ શહેર અને જસદણમાં અડધો ઇંચ વરસાદ
• રાજકોટ શહેરમાં 14 MM
• કોટડાસાંધાણીમાં 7 MM
• ગોંડલમાં 22 MM
• જેતપુરમાં 3 MM
• જસદણમાં 15 MM
• લોધિકામાં 25 MM
• વીંછીયામાં 6 MM

રાજકોટ તાલુકાના સરધાર ગામે વહેલી સવારે ધોધમાર વરસાદ તૂટી પડ્યો હતો. તો ચાર કલાક બાદ હજુ પણ ધીમીધારે વરસાદ ચાલુ છે. આજે સવારથી રાજકોટ શહેર અને ગ્રામ્ય પંથકમાં વરસાદ પડી રહ્યો છે. વરસાદ પડતા વાતાવરણમાં ઠંડક પ્રસરી છે. 

રાજકોટના જેતપુરમાં ભારે પવન સાથે વરસાદ પડ્યો હતો. સવારથી જ કાળાડિબાંગ વાદળો સાથે વરસાદી માહોલ છવાયો હતો. જેતપુરમાં ધીમી ધારે વરસાદ શરૂ થતા જેતપુરના આસપાસના વિસ્તારમાં વરસાદ વાતાવરણમાં ઠંડક પ્રસરી છે. લોકોને ગરમીમાથી રાહત મળી છે, તો બીજી તરફ ખેડૂતોમાં ખુશીનો માહોલ છવાયો છે. 

રાજકોટમાં ગોંડલ શહેર અને પંથકમાં પણ વરસાદ નોંધાયો છે. શહેર અને ગ્રામ્ય વિસ્તારમાં ધોધમાર વરસાદથી સવારથી જ વાદળછાયા વાતાવરણ અને કાળા ડિબાંગ વાદળોથી આકાશ ઘેરાયું છે. ગોંડલ, મોવિયા, શ્રીનાથગઢ, દેરડી સહિતના ગ્રામ્ય વિસ્તારમાં વરસાદ છે. તો શાપર, વેરાવળ, જસદણ, આટકોટ, ગોંડલ શહેર અને પંથકોમાં વરસાદ નોંધાયો છે. ધોધમાર વરસાદથી વાતાવરણમાં ઠંડક પ્રસરી છે. તેમજ સાથે જ જગતનો તાત ખુશખુશાલ છે.