સુરતમાં અવિરત વરસાદથી પૂર જેવી સ્થિતિ, જ્યાં જુઓ ત્યાં પાણી જ પાણી

ઝી મીડિયા બ્યૂરો, સુરત: રાજ્યભરમાં હાલ ભારે વરસાદ (heavy rain) વરસી રહ્યો છે. આવામાં દક્ષિણ ગુજરાતમાં ત્રણ દિવસથી ભારે વરસાદ યથાવત વરસી રહ્યો છે. સુરતમાં છેલ્લા 24 કલાકમાં સૌથી વધુ ઉમરપાડામાં 12 ઈંચ વરસાદ ખાબક્યો છે. આ ઉપરાંત માંગરોળમાં 6 ઈંચ જેટલો વરસાદ વરસ્યો છે. માંડવી તાલુકામાં 5 ઇંચ વરસાદ ખાબક્યો છે. કામરેજ તાલુકામાં 4 ઈંચ કરતા વધુ વરસાદ જ્યારે ઓલપાડ અને સુરત શહેરમાં પણ 4 ઈંચ જેટલો વરસાદ નોંધાયો છે. તો બીજી તરફ ઉપરવાસમાં ભારે વરસાદથી ખાડીમાં પૂરની સ્થિતિ સર્જાઇ છે.

આ પણ વાંચો:- ધોધમાર વરસાદે સુરતને ધમરોળ્યું, ફસાયેલા લોકોને રેસ્ક્યૂ કરાયા

ભારે વરસાદને લઇ રાજ્યના મુખ્યમંત્રી વિજયભાઇ રૂપાણીએ સુરત કલેક્ટર અને મ્યુનિસિપલ કમિશનર સાથે વાત કરી વસાદની પરિસ્થિતિ અંગે તાગ મેળવ્યો હતો. આ ઉપરાંત મુખ્યમંત્રીએ તંત્રને એલર્ટ રહેવા સૂચના આપતા નીચાણવાળા વિસ્તારમાં રહેતા લોકોને ત્વરિત સુરક્ષિત સ્થળે ખસેડવાના આદેશ કર્યા છે. ઉકાઇ અને આંબલી ડેમમાં પાણીની આવકમાં વધારો નોંધાતા અસરગ્રસ્ત ગ્રામજનોને સુરક્ષિત જગ્યાએ ખસેડવા મુખ્યમંત્રીએ સૂચના આપી હતી. ઉકાઇ અને આંબલી ડેમમાંથી ધીમે ધીમે પાણી છોડવા સિંચાઇ વિભાગને સૂચના આપી છે.

આ પણ વાંચો:- શું વડોદરા ફરી ડૂબશે? 16 ફૂટ પર પહોંચી વિશ્વામિત્રી નદીની સપાટી

ભારે વરસાદથી સુરતની ભૂખી નદીમાં પાણીના ધસમસતા પ્રવાહમાં યુવક તણાયાનો લાઇવ વીડિયો સામે આવ્યો છે. માંગરોળ તાલુકાના આંબાવાડી ગામમાં રહેતા 38 વર્ષીય સવજી ચૌધરી નદીના પાણીના વહેણમાં તણાયા છે. સ્થાનિક યુવકોએ બચાવવાનો પ્રયાસ કર્યો પરંતુ નિષ્ફળ રહ્યાં હતા. જ્યારે આજે સવારે 50 વર્ષીય અસોક વસાવા તણાયા હતા. બંનેની લાશનો હજુ સુધી પત્તો મળ્યો નથી. સુરતના કિમ માંડવી સ્ટેટ હાઇવે બેટમાં ફેરવાયો છે. ઘૂંટણસમા પાણી ભરાતા વાહન ચાલકો અટવાયા હતા. સ્ટેટ હાઇવે 65 અને નેશનલ હાઇવે 48ના સર્વિસ રોડ પર પાણી ભરાઇ ગયા હતા.

આ પણ વાંચો:- સુરતના ઉમરપાડામાં સૌથી વધુ 12 ઈંચ, દક્ષિણ ગુજરાતમાં કુલ 58 ટકા વરસાદ

જ્યારે ભારે વરસાદને પગલે સુરત બારડોલી રોડ બંધ કરવામાં આવ્યો છે. ભરત કેન્સર હોસ્પિટલથી એમડી વેલકમ ગેટ સુધી 4 ફૂટ પાણી ભરાયા હતા. સણિયા હેમાદ, કુભારિયા અને પરવતમા બચાવ કામગીરી શરૂ કરાઇ છે. વાલક ખાડી ઉભરાઇ છે. સરથાણા પોલીસ સ્ટેશનમાં પાણી ઘૂસ્યા છે. કઠોર, વેલંજા, સાયણ રોડ પર પણ પાણી ભરાઇ ગયા છે. વેડ રોડ અને આંબા તલાવડી રોડ પર પાણી ભરાવાના કારણે વાહન વ્યવહાર બંધ કરાયો છે.

આ પણ વાંચો:- ગીરની નદીઓમાં ઘોડાપૂર, માધવરાયજી ફરી એકવાર 15 ફૂટ પાણીમાં ગરકાવ

ભેદવાદ ખાડી ભયજનક સપાટીની ઉપર પહોંચી ગઇ છે. મીઠી ખાડીએ ઓગષ્ટ 2006નું લેવલ પણ વટાવ્યું છે. હાલમાં રેકોર્ડબ્રેક 8.90 મીટરે પહોંચી ગઇ છે. સુરતના લિંબાયત પર્વત પાટિયા વિસ્તારમાં ખાડી પૂરની સ્થિતિ સર્જાઇ છે. લિંબાયત ઝોન બહાર પાણી ભરાયા છે. ઝોન ઓફીસ બહાર તળાવ જેવા દ્રશ્યો જોવા મળી રહ્યાં છે. જ્યારે લોકોને અહીંથી પસાર થવામાં ભારે હાલાકીનો સામનો કરવો પડી રહ્યો છે.

આ પણ વાંચો:- 2015 અને 2017માં જે નદીએ બનાસકાંઠામાં વિનાશ સર્જ્યો હતો, ત્યાં ફરી પાણી આવ્યું

ઉલ્લેખનીય છે કે, ભારે વરસાદથી સુરતના અનેક વિસ્તારોમાં પાણી ભરાયા છે. સુરતના અનેક વિસ્તારોમાં પાણી ભરાતા લોકોને રેસ્ક્યૂ કરવાની કામગીરી કરવામાં આવી હતી. ફાયર વિભાગ દ્વારા લોકોને રેસ્ક્યુ કરાયા હતા. સુરતના પોલારીશ માર્કેટ પાસેથી 75 લોકોને રેસ્ક્યુ કરાયા હતા. તો બીજી તરફ, સુરતના નીચાણવાળા વિસ્તારોમાં પાણી ભરાયા છે. ઓલપાડ-હાથીસા રોડ પર ઘુંટણસમા પાણી ઠેરઠેર જોવા મળી રહ્યાં છે. જેને કારણે નાના વાહનોની અવરજવર બંધ થઈ છે.

આ પણ વાંચો:- વલ્લભીપુરની ઘેલો નદી બની ગાંડીતુર, સૌરાષ્ટ્રમાં મોટાભાગનાં જિલ્લાઓમાં અવિરત મેઘમહેર

શાંતિનગર, સિદ્ધનાથનગર સોસાયટીમાં પણ પાણી ભરાયા છે. તો ઓલપાડ વિશ્રામગૃહમાં પણ પાણી ભરાયા હોવાના દ્રશ્યો દેખાયા છે. સતત વરસાદને પગલે સુરતનું જનજીવન પ્રભાવિત થયું હતું. સુરતમાં આવેલી સેના ખાડી ઓવરફલો થતા સમસ્યા વધુ વકરવાની સ્થિતિ ઉદભવી છે. સુરતના પર્વતપાટિયા વિસ્તારમાં પણ પાણીનું સ્તર વધી રહ્યું છે, જેથી લોકો રેસ્ક્યૂ કરવાની ફરજ પડશે.