વિકાસ દુબે એન્કાઉન્ટર: ADG પ્રશાંતકુમારે આપી વિગતવાર માહિતી

લખનઉ: યુપીના એડીજી પ્રશાંત કુમાર (કાયદો વ્યવસ્થા)એ પણ પ્રેસ કોન્ફરન્સ કરીને જણાવ્યું કે 8 પોલીસકર્મીઓ શહીદ થવાના કેસમાં આરોપી વિકાસ દુબે પુત્ર રામકુમાર દુબેને ઉજ્જૈનમાં એમપી પોલીસ દ્વારા ધરપકડ કરાયા બાદ યુપી એસટીએફ દ્વારા કાનપુર લાવવામાં આવી રહ્યો હતો ત્યારે જ્યારે તેણે ભાગવાની કોશિશ કરી તો તેનું એન્કાઉન્ટર કરવામાં આવ્યું. 

તેમણે વધુમાં કહ્યું કે કાનપુર પાસે સવારે 6.30 વાગ્યાની આસપાસ પોલીસની ગાડી પલટી ગઈ. ત્યારબાદ તે હથિયાર છીનવીને ભાગવાની કોશિશ કરવા લાગ્યો તો પોલીસકર્મીઓએ તેને આત્મ સમર્પણ કરવાનું કહ્યું પરંતુ વિકાસ દુબે ન માન્યો અને પોલીસકર્મીઓને મારવા માટે ફાયરિંગ કર્યું. ત્યારબાદ સેલ્ફ ડિફેન્સમાં યુપી એસટીએફએ તેને માર્યો. પછી ઘાયલ વિકાસ દુબેને હોસ્પિટલ લઈ જવાયો જ્યાં ડોક્ટરોએ તેને મૃત જાહેર કર્યો.