આ જ છે ચીનનું અસલ ચરિત્ર, એક બાજુ શાંતિની વાતો બીજી બાજુ આપી `યુદ્ધ`ની પોકળ ધમકી

બેઈજિંગ: ચીન (China) પોતાની નાપાક હરકતો કરવાનું છોડતું નથી. એક બાજુ સરહદ વિવાદ શાંતિપૂર્ણ ઉકેલવાની વાતો કરે છે અને બીજી બાજુ ભારત (India) ને પોકળ ધમકીઓ આપ્યા કરે છે. ચીની કમ્યુનિસ્ટ પાર્ટી (CCP) ના મુખપત્ર ગ્લોબલ ટાઈમ્સ (Global Times)ના સંપાદકે ટ્વીટ કરીને ભારતને પોકળ ધમકી આપી છે. સ્પષ્ટ છે કે રાષ્ટ્રપતિ શી જિનપિંગની સહમતિ વગર આ શક્ય નથી. 

પૂર્વ લદાખ (Ladakh) માં ભારત અને ચીનની સેનાઓ આમને સામને છે. સરહદ વિવાદનો ઉકેલ લાવવા માટે ચીનની ભલામણ પર ભારતના વિદેશ મંત્રીએ હાલમાં જ ચીની સમકક્ષ સાથે મુલાકાત કરી હતી. આ બેઠકમાં બંને દેશો વચ્ચે 5 સૂત્રના એજન્ડા પર સમહતિ બની હતી. આમ છતાં ચીન તરફથી ઉશ્કેરણીજનક કાર્યવાહી ચાલુ છે. 

ભારત દરેક સ્થિતિને પહોંચી વળવા માટે તૈયાર
ભારત ચીનના ચરિત્રથી વાકેફ છે અને એટલે જ દરેક સ્થિતિને પહોંચી વળવા માટે પણ તૈયાર છે. જે પ્રકારે ચીન સતત પોતાનું સ્ટેન્ડ બદલી રહ્યું છે તેનાથી આશંકા છે કે સરહદ વિવાદ જલદી ઉકેલાઈ શકે તેમ નથી. જેને ધ્યાનમાં રાખીને ભારતીય સેનાએ સમગ્ર શિયાળા દરમિયાન લાઈન ઓફ એક્ચ્યુઅલ કંટ્રોલ (LAC) પર તૈનાતીની તૈયારી કરી રાખી છે. લેહ (Leh) સ્થિત 14મી કોરના ચીફ ઓફ સ્ટાફ મેજર જનરલ અરવિંદ કપૂરના જણાવ્યાં મુજબ સેના માટે ઈંધણ, વિશેષ કપડાં, ટેન્ટ, ખાસ ભોજન જેવી વસ્તુઓને પૂરતા પ્રમાણમાં ભેગુ કરી લેવાયું છે જેથી કરીને આગામી 14 મહિના માટે તે પૂરતું થઈ પડે. 

વાયુસેનાના ગ્લોબમાસ્ટર  (Boeing C-17 Globemaster)  અને આઈએસ 76(IL 76) જેવા મોટા ટ્રાન્સપોર્ટ એરક્રાફ્ટથી સાધન સામગ્રી અને અન્ય સામાન સતત લેહ એરપોર્ટ પહોંચાડવામાં આવી રહ્યાં છે. જેમાં આર્કટિક ટેન્ટ, રૂમ ગરમ કરવા માટે કેરો હીટર જેવી ચીજો સામેલ છે. જેની જરૂર ઊંચાઈ પર તૈનાત સૈનિકોને આવનારા શિયાળામાં પડશે.