ડિવિલિયર્સે ફેન્સને આપ્યો જોરદાર ઝટકો, ધન્યવાદ કહી IPL ને પણ કહ્યું બાય-બાય

નવી દિલ્હી: દક્ષિણ આફ્રિકાના પૂર્વ કેપ્ટન અને વિસ્ફોટક બેટ્સમેન એબી ડિવિલિયર્સે સૌ કોઈને ચોંકાવતા હવે ક્રિકેટના તમામ ફોર્મેટ્સમાંથી સંન્યાસ લેવાની જાહેરાત કરી છે. એબી ડિવિલિયર્સ જો કે, ઇન્ટરનેશનલ ક્રિકેટમાંથી પહેલા જ સંન્યાસ લઈ ચૂક્યો હતો, પરંતુ હવે તે IPL અને દુનિયાની કોઈપણ ટી20 ક્રિકેટ લીગમાં રમશે નહીં. એબી ડિવિલિયર્સે ટ્વીટ કરતા લખ્યું- આ એક અવિશ્વસનીય યાત્રા રહી છે, પરંતુ મને તમામ ક્રિકેટમાંથી સંન્યાસ લેવાનો નિર્ણય લીધો છે. મેં મારા બેકયાર્ડમાં મોટા ભાઈઓ સાથે ક્રિકેટ રમવાનું શરૂ કર્યું ત્યારથી મેં આ રમત પૂરા આનંદ અને નિરંકુશ ઉત્સાહથી રમી છે. હવે 37 વર્ષની ઉંમરમાં તે જ્યોત હવે એટલી ઝડપથી બળતી નથી. આભાર.

શાનદાર રહ્યું ડિવિલિયર્સનું ક્રિકેટ કરિયર
ડિવિલિયર્સે IPL ના 184 મેચમાં કુલ 5162 રન બનાવ્યા, જેમાં 40 ફિફ્ટી અને 3 સદી સામેલ છે. ડિવિલિયર્સનો સ્ટ્રાઈક રેટ આ દરમિયાન 151 થી વધારે રહ્યો છે. ડિવિલિયર્સે તેના દેશ દક્ષિણ આફ્રિકા માટે 114 ટેસ્ટ મેચની 91 ઇનિંગમાં 50.66 ની સરેરાશથી 8765 રન બનાવ્યા છે. જેમાં 22 સદી અને 46 ફિફ્ટી સામેલ છે. ટેસ્ટમાં તેનો સર્વોચ્ચ સ્કોર 278 છે. ત્યારે તેણે 228 વન ડે મેચ રમી છે, જેમાં 53.50 ની સરેરાશથી 9577 રન બનાવ્યા છે. વન ડેમાં તેના નામે 25 સદી અને 53 ફિફ્ટી સામેલ છે.

RCB એ આપ્યું આ રિએક્શન
RCB એ ટ્વીટ કરી લખ્યું, એબી ડિવિલિયર્સના રમતના તમામ ફોર્મેટમાંથી સંન્યાસ લેવાની જાહેરાત. એક યુગનો અંત થયો. તમારા જેવું કોઈ નથી, એબી. અમે તમને આરસીબીમાં ખુબ જ મિસ કરીશું. જે પણ તમે કર્યું અને ટીમને જે પણ આપ્યું. ફેન્સ માટે અને ક્રિકેટના ચાહકો તરફથી આપનો આભાર. હેપ્પી રિટાયરમેન્ટ, લેજન્ડ.