IPL 2020: આઈપીએલમાં અમેરિકાની એન્ટ્રી, અલી ખાન કોલકત્તાની ટીમમાં સામેલ

નવી દિલ્હીઃ કોલકત્તા નાઇટ રાઇડર્સ  (Kolkata Knight Riders)એ 29 વર્ષના અમેરિકી ફાસ્ટ બોલર અલી ખાન (Ali Khan)ને હેરી ગર્ની (Harry Gurney)ના સ્થાન પર ટીમમાં સામેલ કર્યો છે. ઈંગ્લેન્ડનો ગર્ની ખભાની ઈજાને કારણે ટૂર્નામેન્ટમાંથી બહાર થઈ ગયો હતો. આ કારણે તે પાછલા મહિને ઈંગ્લેન્ડની વેટાલિટી બ્લાન્ટમાં પણ રમી શક્યો નથી. ખાન આઈપીએલમાં સામેલ થનાર પ્રથમ અમેરિકી ખેલાડી (First USA player in IPL) બની ગયો છે. 

અલીએ સીપીએલ 2020માં ત્રિનબાગો નાઇટ રાઇડર્સ (Trinbago Knight Riders) નું પ્રતિનિધિત્વ કર્યું હતું. ઉલ્લેખનીય છે કે આ વર્ષે કેરેબિયન પ્રીમિયર લીગનું ટાઇટલ જીતનારી TKR અને કેકેઆર  (KKR)ની માલિકી વાળી કંપની એક જ છે. સિનેમા સુપર સ્ટાર શાહરૂખ ખાન બંન્ને કંપનીના માલિક છે. 

ત્રિનબાગોએ સીપીએલમાં તમામ 12 મેચ જીતીને ટાઇટલ કબજે કર્યું. શાહરૂખે તસવીરો પોસ્ટ કરીને પોતાના ટીમની જીત પર ખુશી વ્યક્ત કરી હતી. અલી ખાને ત્રિનબાગો અને ચેન્નઈ સુપર કિંગ્સના ઓલરાઉન્ડર ડ્વેન બ્રાવોની સાથે પ્લેનની અંદરથી એક ફોટો શેર કર્યો જેનું કેપ્શન હતું, 'આગામી સ્ટોપ દુબઈ.'

અલીની વાત કરીએ તો તેને ડ્વેન બ્રાવો સીપીએલમાં લઈને આવ્યો હતો. બ્રાવો અને તેની મુલાકાત ગ્લોબલ ટી20 કેનેડામાં થઈ હતી. અલી બાંગ્લાદેશ પ્રીમિયર લીગ અને પાકિસ્તાન સુપર લીગમાં પણ રમી ચુક્યો છે.