ପ୍ରେମ ପାଇଁ ପାଗଳ: ବନ୍ଧୁକ ମୁନରେ ପ୍ରେମିକାର ମାମୁଁ ଘର ଲୋକେ ବନ୍ଦୀ

ବଲାଙ୍ଗୀର: ପ୍ରେମ ପାଇଁ ମହାନାଟକ । ବନ୍ଧୁକ ମୁନରେ ପ୍ରେମିକାର ମାମୁ ଘର ଲୋକେ ବନ୍ଦୀ । ଦୀର୍ଘ ୫ ଘଣ୍ଟାର ଅପରେସନ ପରେ ପରିବାର ଲୋକଙ୍କୁ ଉଦ୍ଧାର ସହ ଉନ୍ମକ୍ତ ଯୁବକ ବିକ୍ରମ ପଣ୍ଡାଙ୍କୁ କାବୁ କଲା ବଲାଙ୍ଗିର ପୋଲିସ । ବନ୍ଧୁକ ଜବତ କରି ଟାଉନ ଥାନାରେ ବିକ୍ରମକୁ ଅଟକ ରଖି ପଚରାଉଚରା ଚଳାଇଛି ପୋଲିସ। ତେବେ ପ୍ରେମ ନା ଅନ୍ୟ କିଛି ରହସ୍ୟ ନେଇ ଘରକୁ ଯୁବକ ପଶିଥିଲା,  ସେନେଇ ତଦନ୍ତ ଚାଲିଥିବା ଏସପି କହିଛନ୍ତି ।

ପ୍ରେମିକର ବନ୍ଧୁକ ମୁନରେ ପ୍ରେମିକାର ମାମୁ ଘର । ଫିଲ୍ମ ଷ୍ଟାଇଲ (Film Style) ରେ ସମସ୍ତଙ୍କୁ ଚ୍ୟାଲେଞ୍ଜ କଲା ପାଗଳ ପ୍ରେମୀ । ଦୁଇ ରାଉଣ୍ଡ ଗୁଳି ବି ଫୁଟିଲା । ନିଜ ଜିଦରେ ଅଟଳ ରହି ସମସ୍ତଙ୍କୁ ତାଗିଦ୍ କଲା ତାଲପାଲି ପଡ଼ାର ବିକ୍ରମ ପଣ୍ଡା । ଭାଣିଜୀକୁ ଡାକିବାକୁ ଧମକ ଦେଇଥିଲା । ଏ ଖବର ଜଣାପଡ଼ିବା ପରେ ସହରରେ ଚହଳ ସୃଷ୍ଟି ହୋଇଥିଲା। ପୋଲିସ ଓ ଓଡ୍ରାଫ୍ (Odraf) ଟିମ୍ ଘଟଣାସ୍ଥଳରେ ପହଞ୍ଚିବା ସହ ସହରର ବହୁ ଲୋକଙ୍କ ଗହଳି ଲାଗିଥିଲା । ହେଲେ ବନ୍ଧୁକ ଧାରୀ ଯୁବକକୁ କାବୁ କରିବା ଓ ପରିବାର ଲୋକଙ୍କୁ ତା' କବଳରୁ ଉଦ୍ଧାର କରିବା ପୋଲିସ ପାଇଁ ଚ୍ୟାଲେଞ୍ଜ ସୃଷ୍ଟି ହୋଇଥିଲା। 

ଦୀର୍ଘ ୫ ଘଣ୍ଟାର କସରତ ପରେ ପୋଲିସ ପରିବାର ଲୋକଙ୍କୁ ଉଦ୍ଧାର କରିବାରେ ସଫଳ ହୋଇଥିଲା । ଏହି ସମୟରେ ଯୁବକ ବିକ୍ରମ ପଣ୍ଡା ଦୁଇ ରାଉଣ୍ଡ  ଗୁଳି ଚଳାଇ ଥିବା ଏସପି ସୂଚନା ଦେଇଛନ୍ତି । ବିକ୍ରମକୁ ଟାଉନ୍ ଥାନାରେ ଅଟକ ରଖି ପୋଲିସ ଘଟଣାର ଅଧିକ ତଦନ୍ତ ଚଳାଇଛି।

କେମିତି ଥିଲା ଅପରେସନ...

ଘରର ପଛ ପଟ ଝରକା ପଟେ ଓଡ୍ରାଫ କର୍ମଚାରୀ ଘର ଭିତରକୁ ପ୍ରବେଶ କରିଥିଲେ। ୩ ଜଣଙ୍କୁ ଝରକା ପଟେ ଉଦ୍ଧାର କରିଥିଲେ ଓଡ୍ରାଫ୍ କର୍ମଚାରୀ । ଏହାପରେ ବିକ୍ରମକୁ କାବୁ କରିବା ପାଇଁ କୌଶଳ ଆପଣେଇଥିଲା ପୋଲିସ। ଘର ଆଗ ପଟେ ପୋଲିସ କବାଟ ବାଡେଇଥିଲା । ସେହି ସମୟରେ ବିକ୍ରମ ଦୁଇ ରାଉଣ୍ଡ ଗୁଳି ଚଳାଇ ଥିଲା । ଘର ଆଗ ପଟେ ବିକ୍ରମକୁ କଥାବାର୍ତ୍ତାରେ ବ୍ୟସ୍ତ ରଖିଥିଲେ ପୋଲିସ କର୍ମଚାରୀ । ଅନ୍ୟପଟେ ଘର ପଛ ପଟରୁ ଆସି ବିକ୍ରମକୁ କାବୁ କରିଥିଲେ ଓଡ୍ରାଫ୍ ଟିମ (ODRAF Team) । ଏହାପରେ ପୋଲିସ ମାଡ଼ି ବସି ତା'ଠାରୁ ବନ୍ଧୁକ ଜବତ କରିଥିଲେ । ଏହାପରେ ପୋଲିସ ବିକ୍ରମକୁ ଥାନାରେ ଅଟକ ରଖିଛି।