ଜାଗର: ଜାଣନ୍ତୁ ମହାଶିବରାତ୍ରୀ ନେଇ ଲିଙ୍ଗରାଜ ମନ୍ଦିରରେ କଣ ରହିଛି ନୀତି ନିର୍ଘଣ୍ଟ

ଶାନ୍ତସ୍ୱରୁପ ରାଉତ, ଭୁବନେଶ୍ୱର: ମହାଶିବରାତ୍ରି ପାଇଁ ଚଳଚଞ୍ଚଳ ଏକାମ୍ରକ୍ଷେତ୍ର । ରାତି ପାହିଲେ ବାବା ଲିଙ୍ଗରାଜଙ୍କ ବଡ ପର୍ବ ଜାଗର ଯାତ୍ରା । ଗତବର୍ଷ ଭଳି ଏଥର ବି କୋଭିଡ କଟକଣାରେ ପାଳନ ହେବ ପର୍ବ । ଏଥିପାଇଁ ସମସ୍ତ ପ୍ରକାର ପ୍ରସ୍ତୁତି ଶେଷ ହୋଇଛି । ଭିଡ ମ୍ୟାନେଜରୁ ପାର୍କିଂ, ପାନୀୟ ଜଳ, ଧାଡି ଦର୍ଶନ, ବ୍ୟାରିକେଡିଂ ସହ ଭଜନମଣ୍ଡପ କାର୍ଯ୍ୟ ଶେଷ ହୋଇଛି । ନୀତିକାନ୍ତି ଶୃଙ୍ଖଳିତ ସହ ନିର୍ଦ୍ଧାରିତ ସମୟରେ ମହାଦୀପ ଉଠିବା ନେଇ ସେବାୟତ ପ୍ରମୁଖ ପ୍ରସ୍ତୁତ ଥିବା କହିଛନ୍ତି । ସକାଳ ୫ଟାରୁ ସାଧାରଣ ଦର୍ଶନ ଆରମ୍ଭ ହୋଇ କଟକଣାରେ ଜାଗର ଦୀପ ଜାଳିବା ସହ ରାତି ୧୦ଟା ରେ ମହାଦୀପ ଉଠିବାକୁ ନିଷ୍ପତ୍ତି ହୋଇଛି। 

ରାତି ପାହିଲେ ଜାଗର। ଚଳଚଞ୍ଚଳ ଏକାମ୍ରକ୍ଷେତ୍ର, ବାବା ଲିଙ୍ଗରାଜଙ୍କ ସ୍ୱତନ୍ତ୍ର ପୂଜାର୍ଚ୍ଚନା ଓ ନୀତିକାନ୍ତି ପାଇଁ ପ୍ରସ୍ତୁତି ଚୂଡାନ୍ତ। ରାତି ୩ ଟା ରୁ ଖୋଲିବ ମନ୍ଦିର ମୁଖ୍ୟଦ୍ୱାର
୩ଟା ୩୦ ରେ ମଙ୍ଗଳ ଆଳତି ପରେ ଆରମ୍ଭ ହେବ ଅବକାଶ ନୀତି 
୫ଟା ପରଠାରୁ ଆରମ୍ଭ ହୋଇଯିବ ସାଧାରଣ ଦର୍ଶନ 
ଗର୍ଭଗୃହ ଦର୍ଶନ ମନା, ଆଡ଼କାଠରୁ ଦର୍ଶନ କରିବେ ଭକ୍ତ 

ଶୃଙ୍ଖଳିତ ପ୍ରବେଶ ପାଇଁ ମନ୍ଦିର ଚତୁଃପାର୍ଶ୍ଵରେ ବ୍ୟାରିକେଡିଂ ହୋଇଛି । ସିଂହଦ୍ବାର ଦେଇ ପ୍ରବେଶ କରିବା ସହ ଉତ୍ତର ଦ୍ୱାର ପ୍ରସ୍ତାନ କରିବେ ଭକ୍ତ । ନିର୍ଦ୍ଧାରିତ ସମୟ ୧୦ ଟା ରେ ମହାଦୀପ (Mahasivaratri) ଉଠିବା ନେଇ ସେବାୟତ କହିଛନ୍ତି । ବିଏମସି ଓ ଜିଲ୍ଲାପାଳଙ୍କ କଟକଣା କୁ ନେଇ ଉଠିଥିବା ଦ୍ୱନ୍ଦ୍ୱ ଦୂର ହୋଇଥିବା ବେଳେ ପୂର୍ବବର୍ଷ ଭଳି ଏଥର ବି କଟକଣା ଭିତରେ ଶିବରାତ୍ରି ହେବା ନେଇ ସେବାୟତ ପ୍ରସ୍ତୁତ ଥିବା କହିଛନ୍ତି।  

ସେହିପରି ଲିଙ୍ଗରାଜ ମନ୍ଦିର (Lingaraj Temple) ପ୍ରଶାସନ ଓ ବିଏମସି ପକ୍ଷରୁ ମଧ୍ୟ ପ୍ରସ୍ତୁତି ପ୍ରାୟ ଶେଷ ପର୍ଯ୍ୟାୟରେ ପହଞ୍ଚିଛି । ମନ୍ଦିର ସୌନ୍ଦର୍ଯ୍ୟକରଣ ସହ ମନ୍ଦିର ଚତୁଃପାର୍ଶ୍ଵରେ ଥିବା ଛୋଟ ବଡ଼ ମନ୍ଦିର ଆଲୋକୀକରଣ କରିଛି ବିଏମସି । ଏହାସହ ପାନୀୟଜଳ, ଶୌଚାଳୟ ଓ ସ୍ୱଚ୍ଛତା ବ୍ୟବସ୍ଥା ହୋଇଛି । ସେହିଭଳି ଟ୍ରାଫିକ ଓ ପାର୍କିଂ ବ୍ୟବସ୍ଥା ପୋଲିସ ପ୍ରଶାସନ ପକ୍ଷରୁ କରାଯାଇଛି। ରାତିରେ ସାମାଜିକ ଦୂରତା ରକ୍ଷା କରି ଚିହ୍ନଟ ହୋଇଥିବା ସ୍ୱତନ୍ତ୍ର ସ୍ଥାନରେ କେବଳ ଜାଗର ଦୀପ ଜାଳିପାରିବେ ଭକ୍ତ । ସେପଟେ ରାଜଧାନୀର ଏକାଧିକ କଲେଜ ଛାତ୍ରଛାତ୍ରୀ ବାଲି ଓ ରଙ୍ଗ ଦ୍ବାରା ୨ ଫୁଟ୍ ଲମ୍ବ ଏବଂ ୭ ଫୁଟ୍ ଓସାରରେ ଏକ ଶିବଲିଙ୍ଗ ତିଆରି କରିଛନ୍ତି ।

କୋରୋନା (Corona) କାଳରେ ସମସ୍ତ ପର୍ବପର୍ବାଣୀ ଫିକା ପଡ଼ିଥିବାବେଳେ ଆଡ଼ମ୍ବରରେ ପାଳନ ହେବ ମହାଶିବରାତ୍ରି । ଏଥିପାଇଁ ମନ୍ଦିର ସେବାୟତ, ପ୍ରଶାସନ ସମସ୍ତେ ବେଶ ତତ୍ପର ଥିବା ବେଳେ ପ୍ରଭୁକୃପା ଲାଭ କରିବାକୁ ଶ୍ରଦ୍ଧାଳୁଙ୍କ ମନରେ ବେଶ୍ ଉତ୍କଣ୍ଠା ଭରି ରହିଛି ।