ଆଗାମୀ ୫ ଦିନ ପର୍ଯ୍ୟନ୍ତ ବର୍ଷିବ !

ଭୁବନେଶ୍ୱର: ୧୩ ସୁଦ୍ଧା ଲଘୁଚାପ, ୫ ଦିନ ବର୍ଷା । ରାଜ୍ୟରେ ମୌସୁମୀ ଟ୍ରଫ୍ ଲାଇନ ସମେତ ଏକ ଘୂର୍ଣ୍ଣିବଳୟ ସକ୍ରିୟ ରହିଛି । ତେବେ ଆସନ୍ତା ୧୩ ତାରିଖ ସୁଦ୍ଧା ଆନ୍ଧ୍ର ଉପକୂଳ ପଶ୍ଚିମକେନ୍ଦ୍ରୀୟ ବଙ୍ଗୋପସାଗରରେ ଏକ ଲଘୁଚାପ ଘନୀଭୂତ ହେବାର ସମ୍ଭାବନା ରହିଛି । ଏସବୁ ପ୍ରଭାବରେ ଆସନ୍ତା ୫ ଦିନ ପର୍ଯ୍ୟନ୍ତ ବିକ୍ଷିପ୍ତ ଭାବେ ବର୍ଷା ହେବା ନେଇ ସତର୍କ ସୂଚନା ଜାରି କରିଛି ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର । 

ଆସନ୍ତା ୧୨ ଘଣ୍ଟା ମଧ୍ୟରେ କଳାହାଣ୍ଡି, ବଲାଙ୍ଗିର, ସୋନପୁର, କନ୍ଧମାଳ, ଓ ସମ୍ବଲପୁର ଜିଲ୍ଲାରେ ପ୍ରବଳ ବର୍ଷା ଏବଂ ବାଲେଶ୍ବର, ଭଦ୍ରକ, କଟକ, ଜଗତସିଂହପୁର, ଯାଜପୁର, କେନ୍ଦ୍ରାପଡା, ଗଜପତି, ଗଂଜାମ, ଖୋର୍ଦ୍ଧା, ପୁରୀ, ନୟାଗଡ, ବୌଦ୍ଧ, ଅନୁଗୁଳ, ଦେଓଗଡ, କେନ୍ଦୁଝର ଓ ମୟୂରଭଞ୍ଜ ଜିଲ୍ଲାରେ ଘଡଘଡି ସହ ବଜ୍ରପାତ ନେଇ ୟେଲୋ ୱାର୍ଣ୍ଣିଂ ଜାରି କରିଛି କେନ୍ଦ୍ର । 

ସେହିପରି ଆସନ୍ତା ୧୪ ତାରିଖ ଯାଏଁ ପର୍ଯ୍ୟାୟକ୍ରମେ ବିଭିନ୍ନ ଜିଲ୍ଲାରେ ଏପରି ବର୍ଷା ଲାଗି ରହିବାକୁ ଥିବା ବେଳେ ୧୨ ତାରିଖରୁ ଦକ୍ଷିଣ ଓଡିଶାରେ ଅଧିକ ପ୍ରଭାବ ଦେଖାଦେବ । ଏହିସବୁ ଜିଲ୍ଲା ଗୁଡିକରେ ଚାଷୀ ମାନେ ସତର୍କ ରହିବାକୁ ପରାମର୍ଶ ଦେଇଛି କେନ୍ଦ୍ର । ସେପଟେ ଜିଲ୍ଲାପାଳ ମାନେ ସତର୍କ ରହିବାକୁ ଚିଠି ଯୋଗେ ପରାମର୍ଶ ଦେଇଛନ୍ତି ଏସଆରସି ।