ଦେଶରେ କୋରୋନାର ଭାଙ୍ଗିଲା ପୁରୁଣା ରେକର୍ଡ; ପୁଣି ଦିନକରେ ସର୍ବାଧିକ ମୃତ୍ୟୁ

ନୂଆଦିଲ୍ଲୀ: ଦେଶରେ କୋରୋନା ମୃତ୍ୟୁ ଜାରି ରହିଛି ଏବଂ ମହାମାରୀ ହେତୁ ପ୍ରତିଦିନ ଚାରି ହଜାରରୁ ଅଧିକ ଲୋକ ପ୍ରାଣ ହରାଉଛନ୍ତି। ଏହା ସହିତ ନୂତନ ମୃତ୍ୟୁ ସଂଖ୍ୟା ବୃଦ୍ଧି ଘଟିଛି ଏବଂ ଗତ ୨୪ ଘଣ୍ଟା ମଧ୍ୟରେ କୋଭିଡର ୨.୬୭ ଲକ୍ଷ ନୂତନ ମାମଲା ପଞ୍ଜିକୃତ ହୋଇଛି। ମଙ୍ଗଳବାର ସ୍ୱାସ୍ଥ୍ୟ ମନ୍ତ୍ରଣାଳୟ ଦ୍ୱାରା ପ୍ରକାଶିତ ତଥ୍ୟ ଅନୁଯାୟୀ, ଦିନକରେ ଦେଶରେ ୨.୬୩ ଲକ୍ଷ ନୂଆ ମାମଲା ରୁଜୁ ହୋଇଥିଲା।

ଭାରତରେ କୋଭିଡରୁ ଦୈନିକ ମୃତ୍ୟୁ ସଂଖ୍ୟା ବୃଦ୍ଧି ପାଇବାରେ ଲାଗିଛି ଏବଂ ଗତ ୨୪ ଘଣ୍ଟା ମଧ୍ୟରେ ୪୫୨୫ ଜଣ ଲୋକ ପ୍ରାଣ ହରାଇଛନ୍ତି। ଯାହା ମହାମାରୀ ଆରମ୍ଭ ହେବା ପରଠାରୁ ସର୍ବାଧିକ ସଂଖ୍ୟା। ଏହାପୂର୍ବରୁ, ମେ ୧୮ରେ ପ୍ରକାଶିତ ତଥ୍ୟ ଅନୁଯାୟୀ, ସାରା ଦେଶରେ ଦିନକ ମଧ୍ୟରେ ୪୩୨୯ ଜଣଙ୍କର ମୃତ୍ୟୁ ହୋଇଥିବାବେଳେ ମେ ୧୨ରେ, ୪୨୦୫ କୋରୋନା ରୋଗୀ ପ୍ରାଣ ହରାଇଛନ୍ତି।

ୱାର୍ଲ୍ଡୋମିଟର ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ଭାରତରେ କରୋନା ଭାଇରସ (Coronavirus) ରେ ୨ ଲକ୍ଷ ୬୭ ହଜାର ୧୭୪ ଜଣ ସଂକ୍ରମିତ ହୋଇଥିବାବେଳେ ଏହି ସମୟ ମଧ୍ୟରେ ୪୫୨୫ ଜଣଙ୍କର ମୃତ୍ୟୁ ଘଟିଛି। ଏହା ପରେ ଭାରତରେ ମୋଟ କୋରୋନା (Covid19) ସଂକ୍ରମିତ ସଂଖ୍ୟା ୨ କୋଟି ୫୪ ଲକ୍ଷ ୯୫ ହଜାର ୧୪୪କୁ ବୃଦ୍ଧି ପାଇଛି ଓ ୨ ଲକ୍ଷ ୮୩ ହଜାର ୨୭୬ ଲୋକ ପ୍ରାଣ ହରାଇଛନ୍ତି।

ତଥ୍ୟ ଅନୁଯାୟୀ, ଗତ ୨୪ ଘଣ୍ଟା ମଧ୍ୟରେ ସାରା ଦେଶରେ ୩.୮୯ ଲକ୍ଷରୁ ଅଧିକ ଲୋକ କୋରୋନାରୁ ଆରୋଗ୍ୟ (Covid Recover) ଲାଭ କରିଛନ୍ତି। ଏହା ପରେ କୋଭିଡରୁ ସୁସ୍ଥ ହୋଇଥିବା ଲୋକଙ୍କ ସଂଖ୍ୟା ୨ କୋଟି ୧୯ ଲକ୍ଷ ୭୯ ହଜାର ୭୦୩କୁ ବୃଦ୍ଧି ପାଇଛି। ଏହା ସହିତ ସମଗ୍ର ଦେଶରେ ସକ୍ରିୟ ମାମଲାଗୁଡ଼ିକରେ ହ୍ରାସ ଘଟିଛି ଏବଂ ଏବେ ସାରା ଦେଶରେ ୩୨ ଲକ୍ଷ ୩୨ ହଜାର ୧୬୫ ଲୋକ ଚିକିତ୍ସିତ ହେଉଛନ୍ତି।

କୋରୋନାର ଦ୍ୱିତୀୟ ଲହରରେ ଅନେକ ରାଜ୍ୟଗୁଡିକରେ ନୂତନ ମାମଲା ହ୍ରାସ ଘଟିଛି। ଜାତୀୟ ରାଜଧାନୀ ଦିଲ୍ଲୀ ବ୍ୟତୀତ ମହାରାଷ୍ଟ୍ର, ଉତ୍ତର ପ୍ରଦେଶ, ବିହାର, ମଧ୍ୟପ୍ରଦେଶ ଏବଂ ଛତିଶଗଡରେ କୋରୋନା ଆକ୍ରାନ୍ତଙ୍କ ସଂଖ୍ୟା କମିଛି। ଗତ ଦୁଇ ସପ୍ତାହ ମଧ୍ୟରେ ବିହାରର ୩୮ଟି ଜିଲ୍ଲା ମଧ୍ୟରୁ ୧୮ଟିରେ କୋଭିଡ ମାମଲା ହ୍ରାସ ପାଇଥିବାବେଳେ ମଧ୍ୟପ୍ରଦେଶର ୫୨ଟି ଜିଲ୍ଲା ମଧ୍ୟରୁ ୩୩ଟି ଓ ମହାରାଷ୍ଟ୍ରର ୩୬ଟି ଜିଲ୍ଲା ମଧ୍ୟରୁ ୨୪ଟି ଜିଲ୍ଲାରେ କୋରୋନା ମାମଲା ହ୍ରାସ ପାଇଛି।