ହାଇଦ୍ରାବାଦ ଗଣଦୁଷ୍କର୍ମ ଓ ହତ୍ୟା ଘଟଣା: ପ୍ରତିକ୍ରିୟା ରଖିଲେ ନିର୍ଭୟାଙ୍କ ମା'

ନ୍ୟାୟ ପାଇଁ ଦିଶାଙ୍କ ପରିବାରକୁ ୭ ବର୍ଷ ଲଢେଇ କରିବାକୁ ନପଡୁ ।

ନୂଆଦିଲ୍ଲୀ: ହାଇଦ୍ରାବାଦ ମହିଳା ଡାକ୍ତରଙ୍କୁ ଗଣଦୁଷ୍କର୍ମ ଏବଂ ହତ୍ୟା ଘଟଣାକୁ ନେଇ ସାରା ଦେଶରେ ତୀବ୍ର ପ୍ରତିକ୍ରିୟା ପ୍ରକାଶ ପାଉଛି । ଅଭିଯୁକ୍ତମାନଙ୍କୁ ପାଶୀ ଦେବାକୁ ବିଭିନ୍ନ ମହଲାରେ ଦାବି ହେଉଛି । ତେବେ ଏସବୁ ଭିତରେ ସାତ ବର୍ଷ ତଳେ ଗଣଦୁଷ୍କର୍ମର ଶୀକାର ହୋଇଥିବା ନିର୍ଭୟାଙ୍କ ମା' ପ୍ରତିକ୍ରିୟା ରଖିଛନ୍ତି । ନ୍ୟାୟ ପାଇଁ ତାଙ୍କୁ କେତେ କ'ଣ କରିବାକୁ ନପଡିଛି, ତାହା ସେ ବଖାଣିଛନ୍ତି । 

୨୦୧୨ ମସିହାରେ ଦେଶର ରାଜଧାନୀ ନୂଆଦିଲ୍ଲୀରେ ହୋଇଥିବା ନିର୍ଭୟା ଗଣଦୁଷ୍କର୍ମ ଓ ହତ୍ୟା ମାମଲା ସାରା ଦେଶରେ ଆଲୋଡନ ସୃଷ୍ଟି କରିଥିଲା । ତେବେ ସେବେଠୁ ଆଜି ପର୍ଯ୍ୟନ୍ତ ନ୍ୟାୟ ପାଇଁ ଲଢିଚାଲିଛନ୍ତି ନିର୍ଭୟାଙ୍କ ପରିବାର । ଅଭିଯୁକ୍ତମାନଙ୍କୁ ଫାଶୀ ଦଣ୍ଡାଦେଶ ବି ହୋଇଛି । ମାତ୍ର ନିର୍ଭୟାଙ୍କ ମା' ବଖାଣିଛନ୍ତି ଆମ ମନ୍ଥର ନ୍ୟାୟ ବ୍ୟବସ୍ଥାର ଅସଲ କାହାଣୀ । 

ଯେତେବେଳେ ହାଇଦ୍ରାବାଦ ମହିଳା ଡାକ୍ତର ଦିଶା(ଛଦ୍ମନାମ)ଙ୍କୁ ଗଣଦୁଷ୍କର୍ମ ଏବଂ ହତ୍ୟା ଘଟଣା ଏବେ ସାରା ଆଲୋଡନ ସୃଷ୍ଟି କରିଛି, ଠିକ୍ ସେତେବେଳେ ଆସିଛି ନିର୍ଭୟାଙ୍କ ମା'ଙ୍କ ପ୍ରତିକ୍ରିୟା । ଏହି ଘଟଣାକୁ ନେଇ ସେ କହିଛନ୍ତି, ''ହାଇଦ୍ରାବାଦ ଗଣଦୁଷ୍କର୍ମ ଏବଂ ହତ୍ୟା ଘଟଣାର ଅଭିଯୁକ୍ତମାନଙ୍କୁ ତୁରନ୍ତ ଫାଶୀ ମିଳିବା ଦରକାର । ଦିଶାଙ୍କ ପରିବାରକୁ ଶୀଘ୍ର ନ୍ୟାୟ ମିଳୁ । ଆମ ଭଳି ସେମାନେ ୭ ବର୍ଷ ଧରି କୋର୍ଟ କଟେରି ଚକ୍କର ନ କାଟନ୍ତୁ । ଏପରିକି ବାରମ୍ଭାର କାହିଁକି ଏ ପ୍ରକାର ଘଟଣା ଘଟୁଛି, ପ୍ରଶାସନ ସେ ଉପରେ ଚିନ୍ତା କରିବା ଦରକାର। ''

Asha Devi, mother of 2012 Delhi rape & murder victim: Rape and murder of woman veterinarian was barbaric. Unlike us who had to fight for 7 years, she should get justice soon. The administration should reflect on why such incidents re-occur. pic.twitter.com/ULKGJNDOMq

— ANI (@ANI) December 2, 2019

ନିର୍ଭୟା ଗଣଦୁଷ୍କର୍ମ ଘଟଣାର ଜଡିତ ଥିବା ସମସ୍ତ ଅଭିଯୁକ୍ତଙ୍କୁ କୋର୍ଟ ପ୍ରଥମରୁ ହିଁ ଫାଶୀ ଦଣ୍ଡ ଶୁଣାଇ ସାରିଛନ୍ତି । ଜଣେ ମାତ୍ର ଅଭିଯୁକ୍ତ ରାଜକ୍ଷମା ଆବେଦନ କରିଛନ୍ତି । ତେବେ ଏହି ଆବେଦନକୁ ଖାରଜ କରିବା ପାଇଁ ଦିଲ୍ଲୀ ସରକାର ଦୃଢ଼ ପ୍ରସ୍ତାବ ଦେଇଛନ୍ତି । ଯାହାକୁ ନେଇ ଖୁସି ବ୍ୟକ୍ତ କରିଛନ୍ତି ନିର୍ଭୟାଙ୍କ ମା' । ତାଙ୍କ ଝିଅଙ୍କ ସହ ଏପରି କାଣ୍ଡ ଭିଆଇଥିବା ଅପରାଧିମାନେ ଖୁବଶୀଘ୍ର ଫାଶୀ ପାଇବେ ବୋଲି ସେ ଆଶାବ୍ୟକ୍ତ କରିଛନ୍ତି । 

ଦିଲ୍ଲୀ ଗୃହମନ୍ତ୍ରୀ ସତେନ୍ଦ୍ର ଜୈନ ଦିଲ୍ଲୀ ସରକାରଙ୍କ କ୍ଷମା ବିରୋଧରେ ପ୍ରସ୍ତୁତ ଫାଇଲକୁ ଉପରାଜ୍ୟପାଳ ଅନୀଲ ବୈଜଲଙ୍କ ନିକଟକୁ ପଠାଇଛନ୍ତି । ଦିଲ୍ଲୀ ସରକାରଙ୍କ ପ୍ରସ୍ତାବ ସମୀକ୍ଷା କରିବା ପରେ ଉପରାଜ୍ୟପାଳ ବୈଜଲ ଏଥିରେ ନିଜର ମତାମତ ଉଲ୍ଲେଖ କରିବେ। ଏହାପରେ ଏହାର ବିଚାର ପାଇଁ ଫାଇଲକୁ ସ୍ୱରାଷ୍ଟ୍ର ମନ୍ତ୍ରଣାଳୟ ନିକଟକୁ ପଠାଯିବ ବୋଲି ଜଣାପଡିଛି ।

ଆହୁରି ପଢନ୍ତୁ; ଆଜି ହାଇଦ୍ରାବାଦ ଗଣଦୁଷ୍କର୍ମ ଘଟଣାକୁ ନେଇ କମ୍ପିବ ସଂସଦ