Odisha news: ଜଙ୍ଗଲ ଓ ବନ୍ୟପ୍ରାଣୀ ସମ୍ପଦର ଉପଯୁକ୍ତ ପରିଚାଳନା ଉପରେ ଗୁରୁତ୍ୱ ଦିଆଯାଉଥିଲେ ମଧ୍ୟ ରାଜ୍ୟରେ ବନ୍ୟଜନ୍ତୁ ଅପରାଧ ସମେତ ଜଙ୍ଗଲ ସମ୍ବନ୍ଧୀୟ ଅପରାଧରେ ଦୋଷୀ ସାବ୍ୟସ୍ତ ହାର ଅତ୍ୟନ୍ତ କମ୍ ରହିଛି। ୨୦୧୯ରୁ ୨୦୨୪ ମଧ୍ୟରେ ଜଙ୍ଗଲ ସମ୍ପର୍କିତ ଅପରାଧଗୁଡ଼ିକରେ ଦାୟର ହୋଇଥିବା ମାମଲା ଅନୁସାରେ ଦୋଷୀ ସାବ୍ୟସ୍ତଙ୍କ ସଖ୍ୟାକୁ ଦେଖିଲା ଏହା ୦.୨୬% ରହିଛି। ଅର୍ଥାତ୍ ୪ ଭାଗରୁ ଏକଭାଗ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିବାରେ ସଫଳ ହେଉଛି ଜଙ୍ଗଲ ବିଭାଗ। ବାକି ତିନି ଚତୁର୍ଥାଂଶ ଅଭିଯୁକ୍ତଙ୍କୁ ଜଙ୍ଗଲ ବିଭାଗ ଛାଡ଼ିବାକୁ ବାଧ୍ୟ ହେଉଛି।
୨୦୧୯ରୁ ୨୦୨୩ ମଧ୍ୟରେ ଜଙ୍ଗଲ ଅଞ୍ଚଳରୁ କାଠ, କେନ୍ଦୁପତ୍ର, ବନ୍ୟଜନ୍ତୁ ସାମଗ୍ରୀ, ଚନ୍ଦନ, ଯାନବାହନ ଓ ପଥର ଚୋରି ଘଟଣାରେ ହଜାର ହଜାର ଗିରଫ ହୋଇଥିବାବେଳେ ଏହି ଅପରାଧରେ ଦୋଷୀ ସାବ୍ୟସ୍ତ ହାର ମାତ୍ର ୦.୨୮ ପ୍ରତିଶତ ରହିଥିବା ଜଣାପଡ଼ିଛି।
ଜଙ୍ଗଲ, ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗର ପରିସଂଖ୍ୟାନ ଅନୁଯାୟୀ, ୨୦୧୯ରୁ ୨୦୨୩ ମଧ୍ୟରେ ରାଜ୍ୟରେ ୩୨୫୧ ଘନମିଟର କାଠ, ୧୯୭୭ କୁଇଣ୍ଟାଲ କେନ୍ଦୁପତ୍ର, ୪୧୪ଟି ବନ୍ୟଜନ୍ତୁ ସାମଗ୍ରୀ, ୩୨ କୁଇଣ୍ଟାଲ ଚନ୍ଦନ ଓ ପ୍ରାୟ ୩୦୦ କେଜି ପଥର ଓ ପଥର ଜବତ କରାଯାଇଛି। ଏହି ସମୟ ମଧ୍ୟରେ ପାଖାପାଖି ୨୬୦ଟି ଜଙ୍ଗଲ ଗାଡ଼ି ଚୋରି ହୋଇଥିବା ସୂଚନା ମିଳିଛି।
ସେହି ଅନୁଯାୟୀ ବିଭାଗ ପକ୍ଷରୁ ମୋଟ ୬୩୪୮ ଜଣଙ୍କ ବିରୋଧରେ ଏତଲା ଦିଆଯାଇଥିଲା। ମାତ୍ର ୧୮ ଜଣଦୋଷୀ ସାବ୍ୟସ୍ତ ହୋଇଥିବା ବେଳେ ୪୪ ଜଣ ଦୋଷମୁକ୍ତ ହୋଇଛନ୍ତି। ୨୦୨୩ରେ ସର୍ବାଧିକ ୭ ଜଣ ଦୋଷୀ ସାବ୍ୟସ୍ତ ହୋଇଥିବାବେଳେ ୨୦୨୨ରେ ଦୋଷୀ ସାବ୍ୟସ୍ତ ହୋଇଥିଲେ। ସେହିପରି ୨୦୧୯ରେ ୨ ଜଣ, ୨୦୨୦ରେ ୪ ଜଣ ଓ ୨୦୨୧ରେ ୫ ଜଣଙ୍କୁ ବିଭିନ୍ନ ଜଙ୍ଗଲ ଓ ବନ୍ୟଜନ୍ତୁ ସାମଗ୍ରୀ ଜବତ ମାମଲାରେ ଦୋଷୀ ସାବ୍ୟସ୍ତ କରାଯାଇଛି। ୨୦୨୩ରେ ରୁଜୁ ହୋଇଥିବା ଏଫଆଇଆର ସଂଖ୍ୟା ଥିଲା ୧୦୨୨; ସେହିପରି ୨୦୨୨ରେ ୧,୩୬୭ ହୋଇଥିବା ବେଳେ ୨୦୨୧ରେ ଏହି ସଂଖ୍ୟା ୧,୩୭୬ରେ ପହଞ୍ଚିଥିଲା। ୨୦୨୦ରେ ମାମଲା ସଂଖ୍ୟା ୧୩୨୯ ଥିବା ବେଳେ ୨୦୧୯ରେ ମାମଲା ସଂଖ୍ୟା ୧୨୫୪ ଥିବା ଜଙ୍ଗଲ ବିଭାଗର ପରିସଂଖ୍ୟାନରୁ ଜଣାପଡ଼ିଛି।
ଯଦି ୨୦୨୪ ଜୁନ୍ ସୁଦ୍ଧା ଜଙ୍ଗଲ ସମ୍ବନ୍ଧୀୟ ଅପରାଧର ପରିସଂଖ୍ୟାନକୁନଜର ପକାଇଲେ ବନ ବିଭାଗ ୪୩୧ ଜଣଙ୍କ ବିରୋଧରେ ଏତଲା ଦାଏର କରିଛି। ତେବେ ଏହି ସଂଖ୍ୟାକୁ ମିଶାଇଲେ ସାମଗ୍ରିକ ଦୋଷୀ ସାବ୍ୟସ୍ତ ହାର ଆହୁରି ହ୍ରାସ ପାଇ ୦.୨୬ ପ୍ରତିଶତରେ ପହଞ୍ଚିଛି। ଚଳିତ ବର୍ଷ ଏପର୍ଯ୍ୟନ୍ତ କେହି ଦୋଷୀ ସାବ୍ୟସ୍ତ ହୋଇନଥିବାବେଳେ ଜଣେ ବ୍ୟକ୍ତିଙ୍କୁ ବିନା ଦଣ୍ଡରେ ମୁକ୍ତ କରାଯାଇଛି।
ବିପୁଳ ପରିମାଣର ବନଜାତ ଦ୍ରବ୍ୟ ଓ ବନ୍ୟଜନ୍ତୁ ସାମଗ୍ରୀ ଜବତ ସତ୍ତ୍ୱେ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିବାରେ ସରକାର ଓ ବନ ବିଭାଗର ଅସମର୍ଥତା ଜଙ୍ଗଲ ପରିଚାଳନା ଓ ପ୍ରବର୍ତ୍ତନ ବ୍ୟବସ୍ଥାରେ ବ୍ୟାପକ ବ୍ୟବଧାନକୁ ସୂଚାଉଛି।
ଅଯୋଗ୍ୟ ପ୍ରମାଣ ସଂଗ୍ରହ, ଆଇନ ସମ୍ପର୍କରେ ପର୍ଯ୍ୟାପ୍ତ ଜ୍ଞାନର ଅଭାବ, ଅପରାଧ ରିପୋର୍ଟର ଖରାପ ଡ୍ରାଫ୍ଟିଂ ଏବଂ ଚାର୍ଜସିଟ୍ ଦାଖଲରେ ବିଳମ୍ବ ଇତ୍ୟାଦି ଏହିପରି ଅପରାଧୀଙ୍କ ପାଇଁ ଖସିଯିବାର ମାଧ୍ୟମ ହେଉଛି। ଏଣୁ ଦୋଷୀ ସାବ୍ୟସ୍ତ ହେବା ପାଇଁ ଅଭିଯୁକ୍ତଙ୍କ ବିରୋଧରେ ଦୃଢ଼ ମାମଲା ଉପସ୍ଥାପନ କରିବା ଆବଶ୍ୟକ ବୋଲି ମତ ପ୍ରକାଶ ପାଇଛି।
7
 "Odisha news: ଜଙ୍ଗଲ ଅଧିକାରୀଙ୍କ ପାଖରେ ନାହିଁ ଆଇନଗତ ଜ୍ଞାନ: ଖସି ଯାଉଛନ୍ତି ଅପରାଧି")
