Murder Case: ചായ കുടിക്കുന്നതിനിടെ തര്‍ക്കം; വയോധികനെ കത്രിക കൊണ്ട് കുത്തിക്കൊന്നു

കൊച്ചി: വയോധികനെ കത്രിക കൊണ്ട് കുത്തിക്കൊലപ്പെടുത്തിയതായി റിപ്പോർട്ട്. സംഭവം നടന്നത് പറവൂര്‍ കവലയിലെ ഹോട്ടലില്‍ ബുധനാഴ്ച പുലര്‍ച്ചെ അഞ്ചു മണിയോടെയായിരുന്നു.

ഇരുവരും തമ്മിലുണ്ടായ വാക്കുതര്ക്കത്തിനിടെ കത്രിക കൊണ്ട് വയോധികനെ കുത്തി കൊലപ്പെടുത്തുകയായിരുന്നു.  കൊല്ലപ്പെട്ടത് 70 വയസ്സ് തോന്നിക്കുന്ന പറവൂര്‍ സ്വദേശിയാണ്. ഏഴിക്കര സ്വദേശിയായ ശ്രീകുമാറാണ് വയോധികനെ കുത്തിക്കൊലപ്പെടുത്തിയത്. ഇയാളെ പോലീസ് അറസ്റ്റു ചെയ്തു.  കഴിഞ്ഞദിവസം രാത്രി ഇരുവരും ഒരുമിച്ചിരുന്ന് മദ്യപിക്കുന്നതിനിടെയായിരുന്നു വാക്കുതര്‍ക്കം ഉണ്ടായത്.

ശേഷം ബുധനാഴ്ച പുലര്‍ച്ചെ അഞ്ച് മണിയോടെ പറവൂര്‍ കവലയിലെ ഹോട്ടലില്‍ ചായ കുടിക്കുന്നതിനിടെ വീണ്ടും തര്‍ക്കം ഉണ്ടായി. തുടര്‍ന്ന് പ്രതി കടയിലുണ്ടായിരുന്ന കത്രിക കൊണ്ട് വയോധികനെ കുത്തി കൊല്ലുകയായിരുന്നു എന്നാണ് വിവരം.

നിരവധി കേസുകളിലെ പ്രതി സൈജു തങ്കച്ചൻ കാർ തട്ടിയെടുത്ത കേസിൽ പിടിയിൽ!

നിരവധി കേസുകളിലെ പ്രതി സൈജു തങ്കച്ചൻ ബ്ലാക്ക് മെയില്‍ ചെയ്ത് കാര്‍ തട്ടിയെടുത്ത കേസില്‍ അറസ്റ്റിൽ. 2021 ല്‍ പാലാരിവട്ടത്ത് രണ്ട് യുവതികള്‍ കാറപകടത്തില്‍ കൊല്ലപ്പെട്ട കേസിലടക്കം പ്രതിയായ സൈജുവിനെ കൊല്ലത്തുനിന്നാണ് പോലീസ് പിടികൂടിയത്.

ഇയാളും കൂട്ടാളികളും ചേര്‍ന്ന് കഴിഞ്ഞ 23 ന് കൊടുങ്ങല്ലൂര്‍ സ്വദേശിയുടെ കാര്‍ തട്ടിയെടുത്തിരുന്നു. സൈജുവും സുഹൃത്തായ റെയ്സിനും ചേര്‍ന്ന് കൊടുങ്ങല്ലൂര്‍ സ്വദേശി അഭിനന്ദിനെ ബിസിനസ് കാര്യങ്ങള്‍ സംസാരിക്കാനെന്ന വ്യാജേന ചിലവന്നൂരിലെ ഹോട്ടലിലേക്ക് വിളിച്ചു വരുത്തുകയും ശേഷം  സൈജുവും റെയ്‌സും റെയ്സിന്റെ ഭാര്യ റെമീസും ചേര്‍ന്ന് ഇയാളെ ഭീഷണിപ്പെടുത്തി കാറുമായി മുങ്ങുകയുമായിരുന്നു.

ഇയാൾക്കെതിരെ എറണാകുളം ടൗണ്‍ സൗത്ത്, പാലാരിവട്ടം, ഇന്‍ഫോപാര്‍ക്ക്, ഫോര്‍ട്ട്കൊച്ചി, തൃക്കാക്കര അടക്കമുള്ള പോലീസ് സ്റ്റേഷനുകളില്‍ മയക്കുമരുന്ന് കേസുകളും പോക്‌സോ കേസുമുണ്ടെന്ന് പോലീസ് അറിയിച്ചിട്ടുണ്ട്. അറസ്റ്റു ചെയ്ത പ്രതിയെ കോടതിയിൽ ഹാജരാക്കി റിമാന്‍ഡ് ചെയ്തു.