Job Fraud Case: വിദേശത്ത് ജോലി വാഗ്ദാനം ചെയ്‌ത്‌ പണം തട്ടിയെടുത്ത കേസിലെ പ്രതി അറസ്റ്റില്‍

തൊടുപുഴ: യുകെയിൽ ജോലി വാഗ്ദാനം ചെയ്‌ത്‌ പണം തട്ടിയെടുത്ത കേസില്‍ യുവാവ് അറസ്റ്റില്‍. വണ്ണപുറം സ്വദേശി ജോബി ജോസഫിനെയാണ് തൊടുപുഴ പോലീസ് അറസ്റ്റ് ചെയ്‌തത്‌. തൊടുപുഴ സ്വദേശിയുടെ പരാതിയിലാണ് പോലീസ് ഇയാളെ അറസ്റ്റ് ചെയ്തത്. 

അറസ്റ്റിലായ ജോബി തൊടുപുഴ കെഎസ്ആര്‍ടിസി സ്റ്റാന്‍ഡിന് സമീപം റിക്രൂട്ടിങ് സ്ഥാപനം നടത്തി വരികയായായിരുന്നു. ഒരു വര്‍ഷം മുമ്പ് യുകെയില്‍ ജോലി നല്‍കാമെന്ന് പറഞ്ഞ് മൂന്നു ലക്ഷം രൂപ പരാതിക്കാരനില്‍ നിന്ന് ജോബി വാങ്ങിയിരുന്നു. ഏറെ നാളായിട്ടും ജോലി ലഭിക്കാത്തതിനെ തുടര്‍ന്ന് തുക തിരികെ ചോദിച്ചെങ്കിലും ജോബി നല്‍കിയില്ല. 

തുടര്‍ന്നാണ് പരാതിക്കാരൻ തൊടുപുഴ പോലീസിന്‍ പരാതിപ്പെട്ടത്. പരാതിയെ തുടർന്നുള്ള അന്വേഷണത്തിൽ കൂടുതല്‍ പേര്‍ തട്ടിപ്പിനിരയായിട്ടുണ്ടെന്നാണ് സൂചന. നിലവില്‍ ഒരു പരാതിയുടെ അടിസ്ഥാനത്തിലാണ് കേസെങ്കിലും മറ്റ് ജില്ലകളില്‍ നിന്നുള്‍പ്പെടെ 20 ഓളം പരാതികള്‍ ജോബിക്കെതിരെ കിട്ടിയിട്ടുണ്ടെന്നും തുടരന്വേഷണം നടക്കുമെന്നും സിഐ മഹേഷ്‌കുമാര്‍ വ്യക്തമാക്കിയിട്ടുണ്ട്.  പ്രതിയെ കോടതിയില്‍ ഹാജരാക്കിയതിനെ തുടർന്ന് ജാമ്യം ലഭിച്ചിട്ടുണ്ട്.