Fire Accident: ഡൽഹി ഷാദ്രയിൽ വൻ തീപിടിത്തം; 2 കുട്ടികളടക്കം 4 മരണം

ന്യൂഡൽഹി: ഷാദ്രയില്‍ വൻ തീപിടുത്തത്തില്‍ രണ്ട് കുട്ടികളടക്കം നാലു പേര്‍ വെന്തുമരിച്ചു.  ഷാദ്രയിലെ റെസിഡൻഷ്യൽ കെട്ടിടത്തിലാണ് തീപിടുത്തമുണ്ടായത്. മരിച്ചവരുടെ വിശദാംശങ്ങള്‍ ലഭ്യമാകുന്നതേയുള്ളൂ. 

ഇന്ന് പുലര്‍ച്ചെയുണ്ടായ തീപിടുത്തത്തില്‍ കുട്ടികളെയും സ്ത്രീകളെയും മുതിര്‍ന്നവരെയും അടക്കം പത്തിലധികം പേരെ രക്ഷപ്പെടുത്തി.  മരിച്ചവര്‍ ഇവരിലുള്‍പ്പെടുമോ എന്ന കാര്യത്തില്‍ വ്യക്തത വന്നിട്ടില്ല. പരിക്കേറ്റവരുടെ നിലയെ കുറിച്ചും വ്യക്തതയായിട്ടില്ല. ഷാദ്രയിലെ ഗീതാ കോളനിയിൽ ആണ് ഇന്ന് പുലര്‍ച്ചെയോടെ തീപിടുത്തമുണ്ടായത്. 

വിവരമറിഞ്ഞ് അഞ്ചരയോടെ പൊലീസ് സംഭവസ്ഥലത്തെത്തിയ ശേഷം ഫയര്‍ ഫോഴ്സില്‍ വിവരമറിയിക്കുകയായിരുന്നു. തീപിടുത്തത്തിൽ പ്രദേശത്തുണ്ടായിരുന്ന വാഹനങ്ങൾ ഉൾപ്പെടെ കത്തി നശിച്ചു. കുറച്ചധിക സമയമെടുത്താണ് തീ പൂര്‍ണമായും അണച്ചത്.  മരണസംഖ്യ ഇനിയും ഉയരുമോ എന്ന കാര്യത്തിൽ ഇതുവരെ ഒരു വിവരവും ലഭിച്ചിട്ടില്ല.  മുമ്പും പല തവണ തീപിടുത്തമുണ്ടായിട്ടുള്ള ഏരിയയാണ് ഷാദ്രയെന്ന് പോലീസ് പറഞ്ഞു.