Tiger: ഒരു മാസത്തിനിടെ നാല് വളര്‍ത്തു മൃഗങ്ങളെ കൊന്നു; കടുവാ പേടിയില്‍ പുല്‍പ്പള്ളി, രണ്ടാമത്തെ കൂടും സ്ഥാപിച്ചു

കൽപ്പറ്റ: വയനാട് പുൽപ്പള്ളി സുരഭിക്കവലയിൽ കടുവക്കായി വനം വകുപ്പ് രണ്ടാമത്തെ കൂടും സ്ഥാപിച്ചു. ചെതലയം ഫോറസ്റ്റ് റേഞ്ച് ഓഫീസിലേക്ക് നാട്ടുകാർ നടത്തിയ പ്രതിഷേധ സമരത്തിനൊടുവിൽ ആയിരുന്നു കൂടുവെക്കാൻ തീരുമാനമായത്. മേഖലയിൽ ഒരു മാസത്തിനിടെ നാല് വളർത്തു മൃഗങ്ങളാണ് കടുവയുടെ ആക്രമണത്തിൽ കൊല്ലപ്പെട്ടത്. 

കഴിഞ്ഞ മാസം രണ്ടാം തീയതിയാണ് പ്രദേശത്തെ ജനവാസ കേന്ദ്രത്തിൽ ആദ്യം കടുവയുടെ സാന്നിധ്യം സ്ഥിരീകരിച്ചത്. പിന്നാലെ നാട്ടുകാരിൽ ചിലരും യാത്രക്കാരും കടുവയെ നേരിൽ കണ്ടു. പാടിച്ചിറയിൽ വളർത്തു മൃഗത്തെ കടുവ ആക്രമിച്ചതോടെ വനം വകുപ്പ് പ്രദേശത്ത് ആദ്യ കൂട് സ്ഥാപിച്ചു. ഇതിനു പിന്നാലെ പല തവണ കടുവയുടെ ആക്രമണം ഉണ്ടായി. 

കഴിഞ്ഞ ദിവസം പാലമറ്റം സുനിലിന്റെ രണ്ട് വയസ്സ് പ്രായമുള്ള ആട് കൂടി കൊല്ലപ്പെട്ടതോടെ ഒരു മാസത്തിനിടെ കടുവയുടെ ആക്രമണത്തിൽ കൊല്ലപ്പെടുന്ന വളർത്ത മൃഗങ്ങളുടെ എണ്ണം നാലായി. കടുവയെ മയക്കുവെടി വെച്ച് പിടികൂട്ടണമെന്ന് ആവശ്യപ്പെട്ട് നാട്ടുകാർ ബുധനാഴ്ച ചെതലയം റേഞ്ച് ഓഫീസിലേക്ക് മാർച്ച് നടത്തി.

വനം വകുപ്പ് കൂടുകൾ സ്ഥാപിച്ചിട്ടുണ്ടെങ്കിലും കടുവയെ പിടികൂടാനാകാതായതോടെ കടുത്ത ആശങ്കയിലാണ് പ്രദേശവാസികൾ. ഇതിനിടയിൽ പുൽപ്പള്ളി ഇരുളത്ത് ആളുകളെ ആക്രമിച്ച മലയണ്ണാനെ വനം വകുപ്പ് കെണിയൊരുക്കി പിടികൂടി. ഒരു മാസത്തിനിടെ പത്തോളം ആളുകളെയാണ് മലയണ്ണാൻ ആക്രമിച്ച് പരിക്കേൽപ്പിച്ചത്.