`അമ്മേ.. അമ്മ ഞങ്ങളെ വിട്ടു പോയിട്ട് ഇന്നേക്ക് 10 ദിവസായി ട്ടോ`, അമ്മയുടെ വിയോഗത്തിൽ സാഗറിൻ്റെ കുറിപ്പ്

അമ്മ മിനിയുടെ വിയോഗത്തിൽ വേദന പങ്കുവച്ച് സീരിയൽ താരം സാഗർ സൂര്യൻ. സമൂഹമാധ്യമത്തിലൂടെ വികാരനിർഭരമായ ഒരു കുറിപ്പാണ് സാഗർ പങ്കുവച്ചത്. അമ്മ വിട്ടുപോയിട്ട് ഇന്ന് 10 ദവസമായെന്നും, ഇതുൾക്കൊള്ളാൻ തനിക്ക് ആവുന്നില്ലെന്നും സാഗർ പറഞ്ഞു.

എല്ലാവരെയും സ്നേഹിക്കുകയും നല്ലത് മാത്രം ചെയ്തിട്ടും എന്തേ ഇങ്ങനെ സംഭവിച്ചെന്നും, ഒരുപക്ഷെ നമ്മുടെ സ്നേഹക്കൂടുതൽ ദൈവത്തിന് ഇഷ്ടപ്പെടാത്ത കൊണ്ടാണോ എന്നും സാഗർ കുറിപ്പിൽ ചോദിക്കുന്നു. അച്ഛനെയും സഹോദരനെയും പൊന്നുപോലെ നോക്കുമെന്നും അമ്മയുടെ ആഗ്രഹം പോലെ വലിയ അംഗീകാരങ്ങൾ നേടുമെന്നും സാഗർ കുറിച്ചു.

സാഗറിൻ്റെ കുറിപ്പ് വായിക്കാം 

അമ്മേ.. അമ്മ ഞങ്ങളെ വിട്ടു പോയിട്ട് ഇന്നേക്ക് 10 ദിവസായി ട്ടോ. എനിക്ക് ഇതു ഉൾകൊള്ളാൻ പറ്റുന്നില്ല മ്മാ. നമ്മൾ എല്ലാവരെയും സ്നേഹിക്കുകയും എല്ലാവർക്കും നല്ലത് മാത്രം ചെയ്യുകയും അല്ലേ ചെയ്തിട്ടുള്ളൂ അമ്മേ. എന്നിട്ടും.... എനിക്കു എത്ര ആലോചിച്ചിട്ടും മനസ്സിലാവുന്നില്ല. ഇനി നമ്മുടെ സ്നേഹ കൂടുതൽ ദൈവത്തിനു ഇഷ്ടപ്പെടാത്ത കൊണ്ടാണോ.. 

എനിക്ക് ഒന്നിനും ഒരു ഉത്തരം കണ്ടെത്താൻ പറ്റുന്നില്ല അമ്മേ.അമ്മ ഞങ്ങടെ കൂടെ എപ്പോഴും ഉണ്ട്, അങ്ങനെ കരുതനാണ് ഞങ്ങൾക്ക് പറ്റുള്ളൂ. പിന്നെ അമ്മ പേടിക്കണ്ട ട്ടോ, അച്ഛന്റെയും സച്ചുന്റെയും കാര്യം ആലോചിച്ചിട്ട്, അവരെ പൊന്നുപോലെ നോക്കിക്കോളാം ഞാൻ. അമ്മ ഹാപ്പി ആയിട്ടിരുന്നോ. പിന്നെ, അമ്മ ആഗ്രഹിച്ച പോലെ ഒരു ദിവസം കുറെ വല്ല്യ ആൾക്കാരുടെ മുന്നിൽ വച്ച് എനിക്ക് വലിയ ഒരു അംഗീകാരം കിട്ടും.. അമ്മ അത് കണ്ട് ഹാപ്പി ആവും എന്ന് എനിക്ക് ഉറപ്പാ.. ഇനിയങ്ങോട്ട് ഉള്ള ജീവിതത്തിലും അമ്മ എന്റെ കൂടെ തന്നെ ഉണ്ട് എന്ന ഉറച്ച വിശ്വാസത്തിൽ മുന്നോട്ട് പോവാണു..