R Venugopan Passed Away: ചലച്ചിത്ര സംവിധായകൻ ആര്‍ വേണുഗോപൻ അന്തരിച്ചു

കൊച്ചി: ചലച്ചിത്ര സംവിധായകന്‍ ആര്‍ വേണുഗോപന്‍ അന്തരിച്ചു. 70 വയസായിരുന്നു. ചേർത്തലയിലെ വീട്ടിൽ വച്ചായിരുന്നു അന്ത്യം സംഭവിച്ചത്.  

വേണുഗോപാലിന്റെ ആദ്യ ചിത്രം 1998 ല്‍ പുറത്തിറങ്ങിയ കുസൃതിക്കുറുപ്പാണ്. അവസാന ചിത്രം 2017 ല്‍ പുറത്തിറങ്ങിയ സർവ്വോപരി പാലാക്കാരനാണ്. കുസൃതിക്കുറുപ്പ്, ഷാര്‍ജ ടു ഷാര്‍ജ, ചൂണ്ട, ദി റിപ്പോര്‍ട്ടര്‍ എന്നീ ചിത്രങ്ങളും അദ്ദേഹം സംവിധാനം ചെയ്തിട്ടുണ്ട്.  ആദ്യചിത്രമായ കുസൃതിക്കുറുപ്പിൽ ജയറാം ആയിരുന്നു നായകന്‍. 

മീന നായികയായ ചിത്രത്തില്‍ കെപിഎസി ലളിത, ഒടുവില്‍ ഉണ്ണികൃഷ്ണന്‍, ഇന്നസെന്റ്, ജഗതി എന്നിവര്‍ ചിത്രത്തിൽ പ്രധാന കഥാപാത്രങ്ങളെ അവതരിപ്പിച്ചിരുന്നു. 2001 ല്‍ പ്രദര്‍ശനത്തിനെത്തിയ ഷാര്‍ജ ടു ഷാര്‍ജ എന്ന ചിത്രത്തില്‍ ജയറാം തന്നെയായിരുന്നു നായകന്‍. ചിത്രത്തിൽ ഐശ്വര്യ, എംഎന്‍ നമ്പ്യാര്‍ എന്നിവരാണ് പ്രധാന കഥപാത്രങ്ങളെ അവതരിപ്പിച്ചത്. 2003 ല്‍ പുറത്തിറങ്ങിയ ചൂണ്ടയില്‍ ജിഷ്ണു രാഘവന്‍, നിത്യാദാസ്, ഗീതു മോഹന്‍ദാസ്, സിദ്ധിഖ് എന്നിവര്‍ പ്രധാനവേഷത്തിലെത്തിയിരുന്നു.

2015 ല്‍ പ്രദര്‍ശനത്തിനെത്തിയ ദി റിപ്പോര്‍ട്ടര്‍ എന്ന ചിത്രത്തില്‍ അനന്യ, കൈലാഷ്, മധുപാല്‍, അഭിനയ, സമുദ്രക്കനി എന്നിവരാണ് പ്രധാന കഥാപാത്രങ്ങളെ അവതരിപ്പിച്ചത്. സര്‍വോവരി പാലക്കാരനില്‍ അനൂപ് മേനോന്‍ മുഖ്യകഥാപാത്തെ അവതരിപ്പിച്ചപ്പോള്‍ അനു സിതാര, അപര്‍ണ ബാലമുരളി, അലന്‍സിയര്‍ എന്നിവരും പ്രധാനവേഷങ്ങളിലെത്തിയിരുന്നു.