UAE Accident: യുഎഇയിലെ ഖോർഫക്കാനിലെ ബസ് അപകടം: 9 മരണം, 73 പേരെ രക്ഷപ്പെടുത്തി

യുഎഇ: യുഎഇയിലെ ഖോർഫക്കാനിലുണ്ടായ ബസ് അപകടത്തിൽ 9 പേർ മരിച്ചതായി സ്ഥിരീകരിച്ച് ഷാർജ പോലീസ്. ബസിന്റെ ബ്രേക്ക് തകരാറിലായതാണ് വൻ അപകടത്തിലേക്ക് നയിച്ചതെന്നാണ് പോലീസ് പറയുന്നത്

അപകടത്തിൽപെട്ടത് ഇന്ത്യൻ തൊഴിലാളികൾ ഉൾപ്പടെയുള്ളവരാണ്. ഖോർഫക്കാനിൽ ഇന്നലെയായിരുന്നു അപകടം നടന്നത്. അവധി ദിനത്തിൽ ഷോപ്പിങ്ങിനും ഭക്ഷണസാധനങ്ങൾ വാങ്ങാനുമായി കമ്പനി ആസ്ഥാനത്തേക്ക് പോയതായിരുന്നു തൊഴിലാളികൾ. യാത്രയ്ക്കിടെ ബ്രേക്ക് നഷ്ടപ്പെട്ട് നിയന്ത്രണം വിട്ട ബസ് മറിയുകയായിരുന്നു എന്നാണ് റിപ്പോർട്ട്. അപകടത്തിൽപെട്ട 73 പേരെ രക്ഷപ്പെടുത്തിയിട്ടുണ്ട്.  രാജസ്ഥാൻ സ്വദേശികൾ ഉൾപ്പടെയുള്ളവർ അപകടത്തിൽപ്പെട്ടവരിലുണ്ട്.

പരുക്കേറ്റവരെ ഖോർഫക്കാൻ ആശുപത്രിയിലേക്ക് മാറ്റിയിട്ടുണ്ട്. അജ്മാനിൽ നിന്നും  ഖോർഫക്കാനിലേക്ക് വരികയായിരുന്ന ബസായിരുന്നു അപകടത്തിൽപ്പെട്ടത്. ബസിൽ ഉണ്ടായിരുന്നുവരെല്ലാം ഏഷ്യൻ - അറബ് വംശജരാണ്. മരിച്ചവരുടെ പേര് വിവരങ്ങൾ വെളിപ്പെടുത്തിയിട്ടില്ല എന്നാണ് വിവരം.  അപകടത്തെ തുടർന്ന് ട്രാഫിക് നിയമങ്ങൾ  കൃത്യമായി പാലിക്കണമെന്നും വാഹനങ്ങളുടെ അറ്റകുറ്റപ്പണികളും പരിപാലനവും കൃത്യമായിരിക്കണമെന്നും ഷാർജ പോലീസ് നിർദേശിച്ചിട്ടുണ്ട്.