ഫ്രഞ്ച് ഓപ്പണ്‍ മിക്സഡ് ഡബിള്‍സ് കീരിടം ബൊപ്പണ്ണ- ഗബ്രിയേല സഖ്യത്തിന്
ഫ്രഞ്ച് ഓപ്പൺ മിക്സഡ് ഡബിൾസിൽ ഇന്ത്യൻ സഖ്യത്തിന് കിരീടം. ഇന്ത്യയുടെ രോഹന്‍ ബൊപ്പണ്ണ- കനേഡിയന്‍ താരം ഗബ്രിയേല ഡബ്രോവ്സ്ക്കി സഖ്യം കിരീടം ചൂടി.
പാരീസ്: ഫ്രഞ്ച് ഓപ്പൺ മിക്സഡ് ഡബിൾസിൽ ഇന്ത്യൻ സഖ്യത്തിന് കിരീടം. ഇന്ത്യയുടെ രോഹന്‍ ബൊപ്പണ്ണ- കനേഡിയന്‍ താരം ഗബ്രിയേല ഡബ്രോവ്സ്ക്കി സഖ്യം കിരീടം ചൂടി. കൊളംബിയയുടെ റോബര്‍ട്ട് ഫറ-ജര്‍മനിയുടെ അന്ന ലെന ഗ്രോണ്‍ഫെല്‍ഡ് സഖ്യത്തെ ഒന്നിനെതിരെ രണ്ട് സെറ്റുകള്‍ക്കാണ് ഇവർ പരാജയപ്പെടുത്തിയത്. സ്‌കോര്‍ 2-6, 6-2, 12-10. ടൂര്‍ണമെന്‍റില്‍ ഏഴാം സീഡായിരുന്നു ഇരുവരും.
കരിയറിലെ ആദ്യ ഗ്രാന്‍ഡ്സ്ലാം കിരീടമാണ് ബൊപ്പണ്ണ സ്വന്തമാക്കിയത്. കൂടാതെ, ഗ്രാൻസ്‌ലാം കിരീടം ചൂടുന്ന നാലാമത്തെ ഇന്ത്യക്കാരനാണ് ബൊപ്പണ്ണ. ലിയാൻഡർ പെയ്സ്, മഹേഷ് ഭൂപതി, സാനിയ മിർസ എന്നിവരാണ് മറ്റുള്ളവർ.
2010ൽ യു.എസ് ഓപ്പൺ പുരുഷ ഡബിൾസിൽ പാക്കിസ്ഥാന്‍റെ ഐസാമുൾ ഹഖ് ഖുറേഷിയോടൊപ്പം ഫൈനൽ കളിച്ചെങ്കിലും ബ്രയാൻ സഹോദരൻമാരോടു തോറ്റു.