IPL 2024: ഡൽഹിയ്ക്ക് വൻ തിരിച്ചടി; റിഷഭ് പന്തിന് വിലക്ക് ഏർപ്പെടുത്തി ബിസിസിഐ, കാരണം ഇതാണ്

ഐപിഎല്ലിൽ ഡൽഹി ക്യാപിറ്റൽസിന് വൻ തിരിച്ചടി. പ്ലേ ഓഫ് സാധ്യത നിലനിർത്താനുള്ള പോരാട്ടത്തിനിടെ നായകൻ റിഷഭ് പന്തിന് ബിസിസിഐ വിലക്കേർപ്പെടുത്തി. രാജസ്ഥാൻ റോയൽസിനെതിരായ മത്സരത്തിലെ കുറഞ്ഞ ഓവർ റേറ്റിന് പന്തിന് 30 ലക്ഷം രൂപ പിഴയും ഒരു മത്സരത്തിൽ നിന്ന് സസ്‌പെൻഷനും വിധിച്ചു. ഇത് മൂന്നാം തവണയാണ് പന്തിന് കുറഞ്ഞ ഓവർ നിരക്കിന് പിഴ ലഭിക്കുന്നത്. 

ആദ്യ രണ്ട് തവണ പന്തിന് പിഴ മാത്രമാണ് ചുമത്തിയിരുന്നത്. എന്നാൽ മൂന്നാം തവണയും ഓവർ നിരക്കിൽ കുറവ് സംഭവിച്ചതോടെ ഐപിഎൽ പെരുമാറ്റച്ചട്ടം ലംഘിച്ചതിനെ തുടർന്ന് പന്തിനെ ഒരു മത്സരത്തിൽ നിന്ന് സസ്‌പെൻഡ് ചെയ്യുകയായിരുന്നു. ഐപിഎൽ പെരുമാറ്റച്ചട്ടത്തിലെ ആർട്ടിക്കിൾ 8 പ്രകാരം, മാച്ച് റഫറിയുടെ വിധിയെ ചോദ്യം ചെയ്ത് ഡൽഹി ക്യാപിറ്റൽസ് അപ്പീൽ നൽകിയിരുന്നു. ഇതേത്തുടർന്നാണ് അപ്പീൽ ബിസിസിഐ ഓംബുഡ്‌സ്മാൻ്റെ പരിഗണനയ്ക്ക് വിട്ടത്. ഓംബുഡ്‌സ്മാൻ വെർച്വൽ ഹിയറിങ് നടത്തുകയും മാച്ച് റഫറിയുടെ തീരുമാനം അന്തിമമാണെന്ന് സ്ഥിരീകരിക്കുകയും ചെയ്തു. 

ഇന്ന് റോയൽ ചലഞ്ചേഴ്‌സ് ബെംഗളൂരുവിനെതിരെ നടക്കുന്ന ജീവൻ മരണ പോരാട്ടത്തിൽ ഡൽഹിയ്ക്ക് തിരിച്ചടിയാകുക പന്തിന്റെ അസാന്നിധ്യം തന്നെയാകും. പന്തിന്റെ അഭാവത്തിൽ ഓൾറൗണ്ടർ അക്‌സർ പട്ടേൽ ഡൽഹി ക്യാപിറ്റൽസിനെ നയിക്കും. ആർസിബിയുടെ ഹോം ഗ്രൗണ്ടായ ചിന്നസ്വാമി മത്സരത്തിൽ രാത്രി 7.30നാണ് മത്സരം ആരംഭിക്കുക. നിലവിൽ 12 മത്സരങ്ങളിൽ നിന്ന് 6 വിജയവും 6 പരാജയവും അക്കൗണ്ടിലുള്ള ഡൽഹി ചെന്നൈയ്ക്ക് പിന്നിൽ 5-ാം സ്ഥാനത്താണ്. 12 മത്സരങ്ങളിൽ നിന്ന് 5 വിജയവും 7 പരാജയവുമായി ബെംഗളൂരു 7-ാം സ്ഥാനത്താണ്.