ఏపీలో సరికొత్త రాజకీయ సమీకరణ: వైసీపీ - బీజేపీ జతకడుతున్నాయా ?
ఏపీలో రాజకీయ సమీకరణలు శరవేగంగా మారుతున్నాయి. టీడీపీతో సంబంధాలు చెడిపోయిన నేపథ్యంలో బీజేపీ కొత్త మిత్రుల వేటలో పడింది. ఈ క్రమంలో వైసీపీని దగ్గరయ్యే ప్రయత్నాలు మొదలెట్టిందనే పుకార్లు వినిపిస్తున్నాయి. అదే సమయంలో వైసీపీ కూడా కమలనాథులతో దోస్తీ చేసేందుకు అడుగులు వేస్తున్నట్లు ఊహాగానాలు వెలువడుతున్నాయి. తాజా పరిణామాలు కూడా ఈ ఊహాగాలకు బలనిచ్చేవిధంగా ఉన్నాయి.
విశాఖకు ప్రత్యేక రైల్వే జోన్ పై చర్చకు టీడీపీ ఎంపీల అపాయింట్‌మెంట్ ను రైల్వే మంత్రి తిరస్కరించడం..అదే సమయంలో వైసీపీ ఎంపీ విజయసాయిరెడ్డికి అపాయింట్‌మెంట్ ఇవ్వడం వంటి పరిణామాలు వైసీపీ-బీజేపీలు దగ్గరవుతున్నాయనే సంకేతలను ఇస్తున్నాయి. అలాగే ఈ రోజు మీడియా సమావేశంలోను వైసీపీ ఎంపీ విజయసాయిరెడ్డి... ప్రత్యేకహోదా, విభజన హామీలపై టీడీపీని దోషిగా చూపించారు తప్పితే కేంద్రానికి పల్లెత్తు మాట అనలేదు. కేంద్రంలో భాగస్వామిగా ఉన్న టీడీపీ రాష్ట్రానికి ఏ ఒక్క పనిని చేయించలేకపోయిందని ఆరోపించారు.
విజయసాయిరెడ్డి స్పందించిన తీరు... కేంద్రం చేత పనిచేయించడంలో టీడీపీ పూర్తిగా విఫలమైందనే కోణం ఉంది కానీ ..కేంద్రానికి వేలెత్తి చూపినట్లు లేదు...ఇలా తాజా పరిణామాలను గమనిస్తే వైసీపీ- బీజేపీ దోస్తీ చేసేందుకు అడుగులు వేస్తున్నట్లు కనిపిస్తోందని విశ్లేషకులు అభిప్రాయపడుతున్నారు.