రోడ్డు ప్రమాదంలో నందమూరి హరికృష్ణ దుర్మరణం

సినీ నటుడు, మాజీ రాజ్యసభ సభ్యుడు, తెలుగుదేశం పార్టీ సీనియర్‌ నేత నందమూరి హరికృష్ణ కన్నుమూశారు. ఆయన వయస్సు 61 సంవత్సరాలు.నల్గొండ జిల్లాలో ఈ ఉదయం జరిగిన రోడ్డు ప్రమాదంలో తీవ్రంగా గాయపడిన ఆయన ఆసుపత్రిలో చికిత్స పొందుతూ కొద్దిసేపటి కిందట మరణించారు. తలకు తీవ్రగాయమై అధిక రక్తస్రావం కావడంతో వైద్యులు చికిత్స అందించినా ఫలితం లేకపోయింది. దీంతో.. నారా, నందమూరి కుటుంబం శోకసంద్రంలో మునిగింది.

ఈ ఉదయం నల్గొండ జిల్లా నార్కెట్‌పల్లి-అద్దంకి రహదారిపై ఈ ప్రమాదం జరిగింది. నెల్లూరులో ఒక వివాహ వేడుకకు హాజరై హైదరాబాద్‌కు తిరిగి వస్తుండగా ఈ ప్రమాదం చోటు చేసుకుంది. ప్రమాదం జరిగిన సమయంలో కారులో హరికృష్ణతో పాటు నలుగురు ఉన్నట్లు సమాచారం. ఈ ప్రమాదంలో తీవ్రంగా గాయపడిన హరికృష్ణను స్థానికులు నార్కట్‌పల్లిలోని ఆసుపత్రికి తరలించారు. ప్రమాద విషయం తెలుసుకున్న వెంటనే హరికృష్ణ తనయులు ఎన్టీఆర్‌, కల్యాణ్‌రామ్‌తో పాటు ఆంధ్రప్రదేశ్ ముఖ్యమంత్రి చంద్రబాబునాయుడు, మంత్రి లోకేష్ తమ కార్యక్రమాలన్నింటినీ రద్దు చేసుకుని బయలుదేరారు.