Viral Video: బ్యాచిలర్‌ పార్టీలో స్నేహితుల మధ్య గొడవ.. అంకుల్‌ వచ్చి చితక్కొట్టాడు

Pre Wedding Party: స్టార్‌ హోటల్‌లో నిర్వహించిన ప్రీ వెడ్డింగ్‌ పార్టీ తీవ్ర విషాదంగా మారింది. పార్టీలో స్నేహితుల మధ్య జరిగిన వివాదంలో తండ్రి కల్పించుకున్నారు. వెంటనే వచ్చి కుమారుడి స్నేహితులతో గొడవకు దిగి భవనంపై నుంచి ఓ యువకుడిని తోసేశారు. అంకుల్‌ దాడిలో ఇద్దరు తీవ్రంగా గాయపడ్డారు. ప్రస్తుతం వారు ఆస్పత్రిలో చికిత్స పొందుతున్నారు. దాడికి పాల్పడ్డ వ్యక్తి పెద్ద బిజినెస్‌మేన్‌ అని తెలిసింది. ఈ సంఘటన ఉత్తరప్రదేశ్‌లోని బరేలీలో చోటుచేసుకుంది.

బరేలీకి చెందిన ఓ యువకుడికి వివాహం నిశ్చయమైంది. పెళ్లి కుదిరిన సందర్భంగా తన స్నేహితులకు బ్యాచిలర్‌ పార్టీ ఇచ్చాడు. ఈ సందర్భంగా ప్రముఖ ఫైవ్‌ స్టార్‌ హోటల్‌లో పార్టీకి తన స్నేహితులను పిలిచాడు. అందరూ ఎంజాయ్‌ చేస్తున్న సమయంలో ఇద్దరు స్నేహితుల మధ్య వివాదం మొదలైంది. ఆ వివాదం కాస్త ఘర్షణకు దారి తీసింది. దీంతో ఓ యువకుడు తన తండ్రికి ఫోన్‌ చేసి పిలిపించాడు. హోటల్‌కు వచ్చిన తండ్రి తన కుమారుడిని దూషించిన యువకుడిపై దాడికి పాల్పడ్డాడు. కొట్లాడుతూనే టెర్రస్‌పై నుంచి కిందకు తోసేశాడు. అనంతరం మరో యువకుడిపై పలుమార్లు చెంపచెల్లుమనిపించాడు. విచక్షణరాహితంగా దాడికి పాల్పడ్డాడు.

అడ్డుకున్న మరో యువకుడిని కిందపడేసేందుకు ప్రయత్నించగా.. ఇతర స్నేహితులు, హోటల్‌ సిబ్బంది అడ్డుకున్నారు. కిందపడిన యువకుడు తీవ్రంగా గాయపడ్డాడు. వెంటనే హోటల్‌ సిబ్బంది ఆస్పత్రికి తరలించారు. ఈ సంఘటనపై పోలీసులు  కేసు నమోదు చేసినట్లు తెలుస్తోంది. దాడికి సంబంధించిన దృశ్యాలు సీసీ కెమెరాల్లో రికార్డయ్యాయి. అయితే ఫోన్‌ కాల్‌తో వచ్చిన వ్యక్తి ఒక వ్యాపారవేత్తగా తెలిసింది. అయితే ఈ గొడవంతా మద్యం మత్తులో ఉండగా జరిగింది. మద్యంమత్తులో స్నేహితుల మధ్య ఓ విషయమై ఘర్షణ తలెత్తిందని పోలీసులు తెలిపారు.

స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్‌స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్‌లోడ్ చేసుకోండి.