గరుడవేగ సినిమా ప్రత్యేకతలివే
యాంగ్రీ యంగ్ మేన్ డాక్టర్ రాజశేఖర్ నటించిన లేటెస్ట్ సినిమా "గరుడవేగ". విడుదలకు ముందే భారీ అంచనాలను పెంచుకున్న ఈ చిత్రం, విడుదల అయ్యాక కూడా మంచి హిట్ టాక్‌తో దూసుకుపోతోంది.ఈ క్రమంలో ఈ చిత్రానికి సంబంధించిన పలు విశేషాలు మనం కూడా తెలుసుకుందాం..!
ఈ సినిమా బడ్జెట్ దాదాపు 25 కోట్లు. ఇంత బడ్జెట్‌లో అంత మంచి క్వాలిటీతో సినిమా తీయడం దర్శకుడి ప్రతిభే అంటున్నారు విమర్శకులు
గరుడవేగ సినిమా షూటింగ్ దాదాపు ఒక నెల జార్జియో దేశంలో జరిగింది. భీకర వాతావరణ పరిస్థితులలో కనిపించే నేచురాలిటీ కోసం దర్శకుడు ఆ ప్రాంతాన్ని ఎంచుకున్నారు. అయితే అలాంటి వాతావరణంలో షూటింగ్ జరపడం కోసం అక్కడ ప్రభుత్వం నుండి స్పెషల్‌గా పర్మిషన్ తీసుకోవాల్సి వచ్చింది.
ఈ సినిమా కోసం స్టంట్స్ టీమ్ ఎంతగానో కష్టపడింది. దేశం కాని దేశంలో హోటల్స్‌కు దూరంగా ఉన్న ప్రాంతాల్లో 33 రోజుల పాటు బస చేసి పోరాట సన్నివేశాలను చిత్రీకరించారట.
ఈ సినిమాకి సినిమాటోగ్రాఫర్లుగా నలుగురు వ్యవహరించారు. అందులో అంజి, సురేష్ రఘుతు, శ్యామ్ ముగ్గురు కాగా, గికా అనే ఫ్రెంచి సినిమాటోగ్రఫర్ కూడా పనిచేశారు.
ఈ సినిమాకు నిర్మాతగా వ్యవహరించిన ఎం.కోటేశ్వరరాజు, మురళీ శ్రీనివాస్‌లకు ఇదే తొలి సినిమా. అయినా ఖర్చుకి వెనుకాడకుండా సినిమా తీయడం విశేషం.
దర్శకుడు ప్రవీణ్ సత్తారు "గరుడవేగ" స్క్రిప్ట్‌ని 2006లో రాశారు. అయితే దాదాపు 11 సంవత్సరాల తర్వాత సినిమా పట్టాలెక్కడం గమనార్హం.
గరుడవేగ సినిమా తీయడానికి దాదాపు 93 రోజులు పట్టింది.
సినిమా షూటింగ్‌లో పాల్గొనడానికి ముందే రాజశేఖర్‌కు కొన్ని అనారోగ్య కారణాల వలన గుండెపోటు వచ్చింది. దానితో నెల రోజులు రెస్ట్ తీసుకోవాల్సిందిగా డాక్టర్లు సూచించారు. కానీ 10 రోజులకే ఆయన మళ్లీ షూటింగ్‌కి హాజరయ్యారట.
గరుడవేగ సినిమా టీజర్ ఆన్‌లైన్‌లో విడుదల అవ్వగానే దాదాపు 1 మిలియన్ వ్యూస్ వచ్చాయి. ప్రస్తుతం అదే టీజర్ 8 మిలియన్ల వ్యూస్‌తో దూసుకుపోతోంది.