బాహుబలి సినిమాతో దేశవ్యాప్తంగా ఓవర్ నైట్‌లో స్టార్ అయిపోయిన ప్రభాస్ డార్లింగ్ ప్రస్తుతం సాహో సినిమాలో నటిస్తున్న సంగతి తెలిసిందే. బాహుబలి 2 రిలీజైన తర్వాత కొంత గ్యాప్ తీసుకుని ప్రారంభమైన ఈ సినిమా ప్రస్తుతం దుబాయ్‌లో షూటింగ్ జరుపుకుంటోంది. దుబాయ్‌లో పలు సాహాసోపేతమైన యాక్షన్ సీన్స్ తెరకెక్కిస్తున్నారు. అప్పుడెప్పుడో సెట్స్‌పైకి వెళ్లిన ఈ సినిమా రిలీజ్ డేట్ విషయంలోనే ఇంకా ఒక క్లారిటీకి రాలేకపోతోంది. రన్ రాజా రన్ ఫేమ్ సుజీత్ డైరెక్ట్ చేస్తోన్న ఈ సినిమాలో ప్రభాస్ సరసన బాలీవుడ్ నటి శ్రద్ధా కపూర్ హీరోయిన్‌గా నటిస్తోంది. తనని టాలీవుడ్‌కి పరిచయం చేస్తోన్న సాహో సినిమాపై శ్రద్ధా సైతం చాలా ఆశలే పెట్టుకుంది. బాహుబలి తర్వాత దేశవ్యాప్తంగా ప్రభాస్‌కి దేశ వ్యాప్తంగా అభిమాన బలగం ఏర్పడటంతో.. ఇప్పుడు సాహో సినిమా కోసం ఎదురుచూస్తున్న వారిలో బాలీవుడ్ ఆడియెన్స్ సైతం వుండటం విశేషం. సాహో సినిమా అప్‌డేట్స్ సంగతిని కాసేపు పక్కన పెడితే, ప్రభాస్ తర్వాతి సినిమా విషయంలో తాజాగా చాలా అప్‌డేట్స్ వస్తున్నాయి.


సాహో సినిమా సెట్స్‌పై వుండగానే రాధా కృష్ణ దర్శకత్వంలో ఓ సినిమాకు సైన్ చేసిన ప్రభాస్.. అందులో లవర్ బాయ్ గెటప్‌లో కనిపించనున్నాడు. జులై 7వ తేదీ నుంచి ఈ సినిమా సెట్స్‌పైకి వెళ్లేందుకు సిద్ధమవుతోంది. జులై 7వ తేదీ వరకు ఎక్కువ సమయాన్ని సాహో కోసమే వెచ్చించనున్న ప్రభాస్.. ఆ తర్వాత రెండు సినిమాల షూటింగులను మేనేజ్ చేసుకోనున్నాడు. ఈ సినిమాలో ప్రభాస్ హైటుకి తగినట్టుగా డీజే హీరోయిన్, రంగస్థలం ఐటం బ్యూటీ పూజా హెగ్డే ప్రభాస్ సరసన జోడీ కట్టనుంది. యూరప్‌లోనే అధిక భాగం షూటింగ్ జరుపుకోనున్న ఈ సినిమాను వచ్చే ఏడాది సంక్రాంతి బరిలో నిలిపేందుకు ఆ చిత్ర నిర్మాతలు ప్లాన్ చేసుకుంటున్నారు.