Python Snake: దసరా సంబరాల్లో పామును మెడలో వేసుకున్న తాగుబోతు

Drunker With Python Snake: తెలుగు రాష్ట్రాలతోపాటు దేశవ్యాప్తంగా ఆనందోత్సాహాల మధ్య దసరా పండుగ జరిగింది. కుటుంబసభ్యులు, బంధుమిత్రులతో హిందూ ప్రజలు ఆనందంలో మునిగి తేలారు. పండుగ ఆనందంలో ఓ వ్యక్తి ఫుల్‌గా తాగేసి మైకంలో మునిగాడు. ఈ సమయంలో పక్కన కనిపించిన భారీ కొండ చిలువను పట్టేసుకున్నాడు. పట్టేసుకోవడమే కాకుండా మొత్తం చుట్టుకుని ఓ అరుగుపైన నిద్రపోయాడు. ఇది చూసిన స్థానికులు భయభ్రాంతులకు గురయ్యారు. దీనికి సంబంధించిన వీడియో సామాజిక మాధ్యమాల్లో చక్కర్లు కొడుతోంది. ఈ సంఘటన ఆంధ్రప్రదేశ్‌లోని ఉమ్మడి కర్నూలు జిల్లాలో చోటుచేసుకుంది.

నంద్యాల జిల్లా అవుకు మండలం సింగనపల్లి గ్రామంలో దసరా పండుగ ఘనంగా జరిగింది. ఈ పండుగ ఆనందంలో గ్రామానికి చెందిన కంబగిరి అనే వ్యక్తి పీకల దాకా తాగాడు. మద్యం సేవించిన అనంతరం ఇంటికి వెళ్తున్న కొండచిలువ కనిపించింది. దానిని ఏమనుకున్నాడో ఏమోగానీ వెంటనే పట్టేసుకుని మెడలో వేసుకున్నాడు. అక్కడే ఓ ఇంటి ముందు ఉన్న అరుగుపై కూర్చున్నాడు. కొండచిలువను అలాగే చుట్టేసుకుని నిద్రపోవడంతో స్థానికులు భయాందోళన వ్యక్తం చేశారు.

నిద్రిస్తున్న అతడిపై కొండచిలువ బుసలు కొడుతూ.. పాకుతూ స్థానికులను భయాభ్రాంతులకు గురి చేసింది. అనంతరం గ్రామస్తులు, అతడి కుటుంబసభ్యులు కొండ చిలువను పారదోలేందుకు కర్రలతో తీవ్ర ప్రయత్నాలు చేశారు. కొన్ని నిమిషాల పాటు తీవ్ర శ్రమించి కొండచిలువను అతడి నుంచి విడిపించారు. కంబగిరి శరీరంపై నుంచి కొండచిలువను తొలగించి పక్కనే ఉన్న నిర్మానుష్య ప్రాంతంలోకి తరిమివేశారు.

కొండచిలువను తొలగించిన అనంతరం అతడి కుటుంబసభ్యులు వెంటనే ఇంటికి తీసుకెళ్లారు. ఈ సంఘటనతో అందరూ ఊపిరి పీల్చుకున్నారు. కాగా తాగిన మైకంలో అతడు కొండచిలువతో చేస్తున్న విన్యాసాలను కొందరు సెల్‌ఫోన్‌లలో బంధించారు. ఆ దృశ్యాలు కాస్త సామాజిక మాధ్యమాల్లో చక్కర్లు కొడుతున్నారు. స్థానికులు అతడిపై కేకలు వేస్తున్నా పట్టించుకోనే పరిస్థితిలో లేడని వీడియో చూస్తే అర్థమవుతోంది. మద్యం మత్తులో ఉన్న సమయంలో దేనితో ఆటలు ఆడుతున్నాడో అనే విషయం కూడా గుర్తించలేని పరిస్థితిపై నెటిజన్లు నోరెళ్ల బెడుతున్నారు. మరి తాగలా? అని కొందరు ప్రశ్నిస్తున్నారు. 'దసరా పండుగ అంటే మామూలుగా ఉంటదా. ఇది లెక్క' అంటూ కామెంట్లు చేస్తున్నారు. ఈ వీడియో నెట్టింట్లో తిరుగుతోంది.

స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్‌స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్‌లోడ్ చేసుకోండి.