ఐసిసి ప్రపంచ కప్ పోటీల నుంచి భారత్ నిష్క్రమించిన మరుక్షణం నుంచే మహేంద్ర సింగ్ ధోని ఇక క్రికెట్‌కి వీడ్కోలు పలుకుతాడనే ఊహాగానాలు మొదలయ్యాయి. ధోనీ నోటి వెంట ఏమీ రాకుండానే రకరకాల పుకార్లు షికార్లు చేశాయి. అయితే, ఇప్పటికే ధోనీ రిటైర్ మెంట్ పైనే ఓ స్పష్టత లేదని భావిస్తున్న ప్రస్తుత తరుణంలో ఆయన ఏకంగా వచ్చే ఏడాది ఐపిఎల్ పోటీల్లో పాల్గొంటాడని ధీమా వ్యక్తంచేస్తూ తాజాగా చెన్నై సూపర్ కింగ్స్ అధికారవర్గాలు పేర్కొన్నట్టుగా ఓ వార్త మీడియాలో ఆసక్తిని రేకెత్తిస్తోంది. 


అవును, టైమ్స్ నౌ న్యూస్ ప్రచురించిన ఓ కథనం ప్రకారం.. ఐపిఎల్ 2020లో కూడా ధోని చెన్నై సూపర్ కింగ్స్ జట్టు తరుపునే ఆడుతాడని ఆశాభావం వ్యక్తంచేస్తూ ఆ జట్టు అధికారవర్గాలు వెల్లడించినట్టు తెలుస్తోంది. వరల్డ్ కప్ పోటీల తర్వాత వన్డేల నుంచి వైదొలగినా.. ఇంకొంత కాలంపాటు టీ20 ఫార్మాట్స్‌లో కొనసాగుతాడని, అలాగే ఐపిఎల్ 2020లోనూ పాల్గొంటాడని సదరు సీఎస్కే వర్గాలు అభిప్రాయపడినట్టుగా ఆ కథనం పేర్కొంది. ఎందులో ఎంత క్లారిటీ ఉందో తెలియాలంటే.. ధోనినే స్వయంగా పెదవివిప్పే వరకు వేచిచూడాల్సిందే మరి.