వైజాగ్‌కి వచ్చినందుకు సంతోషం... బాగా ఆడండి: కోహ్లీకి చంద్రబాబు బెస్ట్ విషెస్
విశాఖపట్నంపై టీమిండియా కెప్టెన్ విరాట్ కోహ్లీ చేసిన ట్వీట్‌కి ఆంధ్రప్రదేశ్ ముఖ్యమంత్రి నారా చంద్రబాబు నాయుడు సమాధానమిచ్చారు.
విశాఖపట్నంపై టీమిండియా కెప్టెన్ విరాట్ కోహ్లీ చేసిన ట్వీట్‌కి ఆంధ్రప్రదేశ్ ముఖ్యమంత్రి నారా చంద్రబాబు నాయుడు సమాధానమిచ్చారు. అయిదు వన్డేల సిరీస్‌లో భాగంగా భారత్, వెస్టిండీస్ జట్లు ఈ రోజు విశాఖలో క్రికెట్ రెండో వన్డే ఆడనున్న సంగతి తెలిసిందే. ఈ క్రమంలో విశాఖకు వచ్చిన కోహ్లీ, ఈ నగరంపై తనదైన శైలిలో ప్రశంసల వర్షం కురిపించారు. "అద్భుతమైన ప్రదేశం. విశాఖకు రావడాన్ని ఎంతో ప్రేమిస్తాను" అని ట్వీట్ చేశారు. అయితే విరాట్ కోహ్లీ ట్వీట్ పై ముఖ్యమంత్రి చంద్రబాబు నాయుడు స్పందించారు.
"వైజాగ్ అనే ప్రదేశం ఈ దేశం, ప్రపంచం ప్రేమించే గమ్యస్థానం అవుతుంది. విశాఖ వన్డే సందర్భంగా విరాట్ కోహ్లీతో పాటు టీమిండియాకి శుభాకాంక్షలు’ అంటూ ట్వీట్ చేశారు. టీమ్‌ఇండియాకు బాగా కలిసొచ్చిన వేదికగా విశాఖపట్నంలోని వీడిసీఐ స్టేడియంను చెప్పుకోవచ్చు. ఈ స్టేడియంలోనే ధోని తన సత్తా చాటి చరిత్రను నమోదు చేశాడు.
కాగా..విశాఖపట్నంలోని డా.వై.ఎస్. రాజశేఖర్ రెడ్డి ఏసీఏ-వీడీసీఏ క్రికెట్ స్టేడియంలో విండీస్‌తో జరగనున్న 2వ వన్డే ఇంటర్నేషనల్ మ్యాచ్‌లో ఆడనున్న ఆటగాళ్ల జాబితాను తాజాగా బీసీసీఐ విడుదల చేసింది. గౌహతిలో మొదటి వన్డే మ్యాచ్‌లో ఆడిన జట్టు ఆటగాళ్ల పేర్లనే ఈ వన్డే మ్యాచ్‌లోనూ పరిగణనలోకి తీసుకున్నట్టు బీసీసీఐ స్పష్టంచేసింది.
మొదటి వన్డేలో బౌలింగ్ విభాగంలో ముగ్గురు పేసర్లు, ఇద్దరు స్పిన్నర్లు ఉన్నారు. ఈ రోజు వన్డేలో ఆడనున్న టీమిండియా ఆటగాళ్ల జాబితా: విరాట్ కోహ్లీ (కెప్టేన్), శిఖర్ ధవన్, రోహిత్ శర్మ, అంబటి రాయుడు, రిశబ్ పంత్, ఎంఎస్ ధోని (వికెట్ కీపర్), రవీంద్ర జడేజా, కుల్దీప్ యాదవ్, యుజ్వేంద్ర చాహల్, ఉమేష్ యాదవ్, మొహమ్మద్ షమీ, సయ్యద్ ఖలీల్ అహ్మెద్.