Telangana updates: తెలంగాణలో 650కి చేరిన కరోనా పాజిటివ్ కేసులు

హైదరాబాద్‌ : తెలంగాణలో కరోనావైరస్ పాజిటివ్ కేసుల సంఖ్య మొత్తం 650కి చేరింది. తెలంగాణలో బుధవారం కొత్తగా నమోదైన 6 కరోనా పాజిటివ్‌ కేసులతో కలిపి  మొత్తం కేసుల సంఖ్య 650కి చేరిందని వైద్య, ఆరోగ్య శాఖ ప్రకటించింది. బుధవారం నాడు 8 మంది డిశ్చార్జ్‌ అవడంతో ఇప్పటివరకు 118 మంది కోవిడ్ బారి నుంచి నయమై ఆస్పత్రుల నుంచి డిశ్చార్జ్ అయినట్టయింది. ఇప్పటివరకు 18 మంది మృతి చెందారు. ఇవే కాకుండా రాష్ట్రంలో ప్రస్తుతం 514 యాక్టివ్‌ కేసులు ఉన్నాయని వైద్య, ఆరోగ్య శాఖ స్పష్టంచేసింది. ఇదిలావుంటే, కరోనా వ్యాప్తి నివారణకు తీసుకుంటున్న చర్యలు, వైరస్ సోకిన వారికి అందుతున్న వైద్య సహాయం, లాక్ డౌన్ అమలు, పేదలకు అందుతున్న సాయం, వ్యవసాయ ఉత్పత్తుల కొనుగోలు, కేంద్ర ప్రభుత్వ మార్గదర్శకాలు తదితర అంశాలపై ముఖ్యమంత్రి కేసీఆర్ బుధవారం ప్రగతిభవన్‌లో ఉన్నతస్థాయి సమీక్ష నిర్వహించారు.