OLX Layoffs: ఓఎల్ఎక్స్‌లోనూ లే ఆఫ్.. 1500 మంది ఉద్యోగులపై వేటు! భారత్‌లో కూడా

OLX Group To Cut 1500 Jobs Globally: ప్రపంచ వ్యాప్తంగా ఐటీ కంపెనీలలో ఉద్యోగుల తొలగింపుల ప్రక్రియ కొనసాగుతోంది. కంపెనీపై అదనపు భారాన్ని తొలగించుకుని.. నష్టాల నుంచి బయటపడేందుకే 'లే ఆఫ్' ప్రకటిస్తున్నాయి. తాజాగా ఆన్‌లైన్ ట్రేడింగ్ కంపెనీ 'ఓఎల్ఎక్స్' కూడా ఉద్యోగులను తొలగించేందుకు సిద్ధమైంది. ప్రపంచ వ్యాప్తంగా 1500 మందిని తొలగించేందుకు సిద్ధమవుతోంది. ఆన్‌లైన్‌లో సెకండ్‌ హ్యాండ్‌ వస్తువులను విక్రయించే వేదికగా ఓఎల్ఎక్స్‌ అందరికీ సుపరిచితమే.

ఓఎల్ఎక్స్‌లో 10 వేల మంది పని చేస్తుండగా.. 15 శాతం మందిని (1500 మంది) తొలగించేందుకు (OLX Layoffs 2023) చర్యలు చేపడుతోందట. 1500 మందిలో భారత్‌లో పనిచేస్తున్న ఉద్యోగులు కూడా ఉన్నారు. అయితే ఎంత మందిని తొలగిస్తున్నారనే విషయం తెలియరాలేదు. ఆర్థిక మాంద్యం భయాల నేపథ్యంలో ఈ తొలగింపులు చేపడుతున్నట్లు ఓ ప్రకటనలో తెలిసింది. ఆర్థిక మాంద్యం కారణంగా ఉద్యోగుల తొలగింపుల పర్వం కొనసాగుతోంది. మైక్రోసాఫ్ట్‌, అమెజాన్‌, ట్విటర్‌, స్విగ్గీ, గూగుల్, ఫిలిప్స్ కంపెనీలు తమ ఉద్యోగులను తొలగించిన విషయం తెలిసిందే

ఓఎల్‌ఎక్స్‌ (OLX) తొలగింపు నిర్ణయంతో.. కంపెనీ ఆటో బిజినెస్‌పై ఎక్కువ ప్రభావం పడే అవకాశం ఉంది. ఇంజినీరింగ్‌, ఆపరేషన్స్‌ టీమ్‌లో పనిచేసే ఉద్యోగులపై కూడా తొలగింపుల ప్రభావం ఉండబోతోందట. ఆర్థిక పరిస్థితుల నేపథ్యంలో ఖర్చులు తగ్గించుకోవడంలో భాగంగా ఓఎల్‌ఎక్స్‌ ఈ నిర్ణయం తీసుకుందని కంపెనీ ప్రతినిధి తెలిపారు. భవిష్యత్‌ ఆశయాలు, అవసరాలను దృష్టిలో పెట్టుకుని ఉద్యోగుల సంఖ్యను తగ్గించుకుంటున్నట్లు చెప్పారు. 

ఓఎల్‌ఎక్స్‌ గ్రూప్‌ భారత్‌లో 2009లో ప్రారంభించారు. సెకండ్‌ హ్యాండ్‌ వస్తువులను విక్రయించే వేదికగా కొద్ది కాలంలోనే ప్రజలకు చేరువైంది. ప్రస్తుతం ఆన్‌లైన్ సెకండ్ హ్యాండ్ వస్తువుల విక్రయంలో అగ్ర స్థానంలో ఉంది. ఓఎల్‌ఎక్స్‌ కంపెనీ 2020 జనవరిలో ఓఎల్‌ఎక్స్‌ ఆటో పేరిట ప్రీ-ఓన్డ్‌ కార్స్‌ వ్యాపారాన్ని కూడా ప్రారంభించింది. 

స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్‌స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్‌లోడ్ చేసుకోండి.