Bird Flu ના જોખમને પગલે કેન્દ્ર સરકાર એક્શનમાં, લીધો અત્યંત મહત્વનો નિર્ણય

નવી દિલ્હી: લગભગ 6 કરતા વધુ રાજ્યોમાં બર્ડ ફ્લૂ (Bird Flu) ના કેસ સામે આવ્યા બાદ રાજ્ય સરકારો અલર્ટ મોડ પર છે. આ બાજુ કેન્દ્ર સરકારે પણ સ્થિતિની ગંભીરતા જોતા એક કંટ્રોલ રૂમ બનાવ્યો છે જેનાથી દરેક રાજ્યના સંપર્કમાં રહી શકાય. 

મધ્ય પ્રદેશમાં બર્ડ ફ્લૂના સૌથી વધુ કેસ
કોરોના સંક્ટ વચ્ચે દેશમાં સામે આવી રહેલા બર્ડ ફ્લૂના કેસ ડરાવી રહ્યા છે. મધ્ય પ્રદેશમાં બર્ડ ફ્લૂના સૌથી વધુ કેસ સામે આવ્યા છે. અહીં સેંકડોની સંખ્યામાં કાગડા મરી ગયા છે અને તેમનામાં આ વાયરસ મળ્યો છે. મધ્ય પ્રદેશના મુખ્યમંત્રી શિવરાજ સિંહ ચૌહાણે હાલાત જોતા ઈમરજન્સી બેઠક બોલાવી છે. રાજ્યમાં પોલ્ટ્રી ફાર્મમાં પક્ષીઓના સેમ્પલ લેવામાં આવશે. આ માટે જલદી રાજ્ય સરકાર નિર્દેશ બહાર પાડશે. 

કોરોનાની વાત કરીએ તો સમગ્ર દુનિયામાં એક વર્ષની અંદર કોરોના વાયરસથી 18 લાખ 64 હજાર લોકોના મૃત્યુ થયા છે. અને હાલના સમયમાં કોરોનાથી મૃત્યુદર 3 ટકા છે. જ્યારે બર્ડ ફ્લૂથી સંક્રમિત દર્દીઓના મૃત્યુનો દર 60 ટકા છે. તેનો અર્થ એ થયો કે કોરોના વાયરસની સરખામણીમાં બર્ડ ફ્લૂ માણસો માટે વધુ જોખમી છે. બર્ડ ફ્લૂથી દર્દીના મૃત્યુ દર કોરોનાની સરખામણીએ 20 ઘણો વધુ છે.