Bengal Election Live: બંગાળમાં સાતમા તબક્કાનું થઈ રહ્યું છે મતદાન, આ બેઠક પર બધાની નજર

નવી દિલ્હી:  પશ્ચિમ બંગાળ વિધાનસભા ચૂંટણી (West Bengal Assembly Election 2021) ના સાતમા તબક્કાનું આજે મતદાન છે. સવારે 7 વાગે મતદાન શરૂ થઈ ગયું છે. આ તબક્કામાં પ્રદેશની કુલ 34 વિધાનસભા બેઠકો માટે 284 ઉમેદવારો મેદાનમાં છે. એક બાજુ કોરોનાનો કેર છે અને બીજી બાજુ ચૂંટણી ચાલુ છે. બંગાળમાં કોરોનાના નવા 15,889 નવા કેસ સામે આવ્યા છે. 

મમતાના ગૃહ ક્ષેત્ર ભવાનીપુર પર બધાની નજર
બંગાળમાં આજે સાતમા તબક્કાનું મતદાન થઈ રહ્યું છે. જેમાંથી એક બેઠક ભવાનીપુર છે. મમતા હાલ ભવાનીપુર બેઠકથી વિધાયક છે. પરંતુ તેમણે નંદીગ્રામથી ચૂંટણી લડવાનું નક્કી કર્યું. ભવાનીપુર માટે તૃણમૂલ કોંગ્રેસ તરફથી મમતાએ રાજ્યના વીજમંત્રી સોભનદેબ ચટ્ટોપાધ્યાયને મેદાનમાં ઉતાર્યા છે. જેમની સામે ભાજપના રૂદ્રનિલ ઘોષ છે જે ટીએમસીમાંથી જ ભાજપમાં આવેલા છે. 

કોરોના પ્રોટોકોલ અંગે ગંભીર છીએ-ચૂંટણી પંચ
બંગાળમાં કોરોનાના વધતા કેસ અને ચૂંટણી જોતા ચૂંટણી પંચ પણ સતર્ક છે. વોટિંગ સમયે કોવિડ પ્રોટોકોલનું સંપૂર્ણ ધ્યાન રાખવામાં આવશે. છેલ્લા 24 કલાકમાં પશ્ચિમ બંગાળમાં કોરોનાના 15889 નવા કેસ સામે આવ્યા છે. જ્યારે 57 લોકોના મોત થયા છે. એકલા કોલકાતામાં જ સાડા ત્રણ હજારથી વધુ કેસ નોંધાયા છે.