ACF ସୌମ୍ୟରଞ୍ଜନ Death ମିଷ୍ଟ୍ରି: ୩ଦିନ ପୂର୍ବରୁ ସ୍ତ୍ରୀ ସହ ହୋଇଥିଲା କି କଣ୍ଟ୍ରାକ୍ଟ ?

ପାରଳାଖେମୁଣ୍ଡି: ଗଜପତି ଜିଲ୍ଲାର ଚର୍ଚ୍ଚିତ ଏସିଏଫ ସୌମ୍ୟରଞ୍ଜନ ମହାପାତ୍ରଙ୍କ ମୃତ୍ୟୁ ଘଟଣାରେ ଦିନକୁ ଦିନ ଅଧିକ ଜଟିଳ ହେଉଛି ତଦନ୍ତ । ଏକ କଣ୍ଟ୍ରାକ୍ଟ ସାମ୍ନାକୁ ଆସିଛି, ଯାହା ସୌମ୍ୟଙ୍କ ମୃତ୍ୟୁର ଠିକ୍ ୩ ଦିନ ପୂର୍ବରୁ କରାଯାଇଥିଲା । ଯେଉଁଥିରେ ଉଲ୍ଲେଖ ରହିଥିଲା, ଏଣିକି ସୌମ୍ୟଙ୍କ ଦରମା ସାଙ୍ଗକୁ ସବୁକିଛି ସ୍ଥାବର-ଅସ୍ଥାବର ସମ୍ପତ୍ତି ଉପରେ ରହିବ ପତ୍ନୀ ବିଦ୍ୟାଭାରତୀଙ୍କ ଅଧିକାର । ଆଉ ଆଶ୍ଚର୍ଯ୍ୟଜନକ ଭାବରେ ଏହାର ମାତ୍ର ୩ ଦିନ ପରେ ପୋଡ଼ିହୋଇ ସୌମ୍ୟଙ୍କର ମୃତ୍ୟୁ ଘଟିଲା । ସୌମ୍ୟଙ୍କ ବାପା ନ୍ୟାୟ ପାଇଁ ଡିଜିପିଙ୍କ ଦ୍ୱାରସ୍ଥ ହୋଇଛନ୍ତି। 

ଘଟଣାର କ୍ରାଇମବ୍ରାଞ୍ଚ (CrimeBranch) ତଦନ୍ତ ବି ଦାବି କରିଛନ୍ତି ସୋମ୍ୟଙ୍କ ବାପା । ଏଥିସହ ପୁଅର ହତ୍ୟା ପଛରେ ବୋହୂର ଅନୈତିକ ସମ୍ପର୍କ ହିଁ ମୁଖ୍ୟ କାରଣ ବୋଲି ତାଙ୍କ ମା' କହିଛନ୍ତି । ବୋହୂର ଚରିତ୍ର ଉପରେ ଅଙ୍ଗୁଳି ଉଠାଇ ସୌମ୍ୟଙ୍କ ମା' ଖୋଲିଛନ୍ତି ବଲାଙ୍ଗିର ଲିଙ୍କ୍ ।  କହିଲେ, ଅଶ୍ଳୀଳ ଫଟୋକୁ ନେଇ ପୁଅକୁ କରାଯାଉଥିଲା ବ୍ଲାକମେଲିଂ। ଏଣେ ତାଙ୍କ ଜୀବନ ପ୍ରତି ବିପଦ ଥିବା ପୂର୍ବରୁ ଆଭାସ ପାଇଥିଲେ ସୌମ୍ୟ । ଆଉ ଏ ସମ୍ପର୍କରେ ସେ ନିଜ ହାତରେ ମଧ୍ୟ ଲେଖିଥିଲେ। ସେହି ଚିଠିକୁ ପାଇଛି ପୋଲିସ । ଯଦି ନିରପେକ୍ଷ ଭାବରେ ତଦନ୍ତ ହୁଏ, ତେବେ ଅଭିଯୁକ୍ତ ଗିରଫ ହେବେ ବୋଲି ଆଶା ରଖିଛନ୍ତି ସୌମ୍ୟରଞ୍ଜନଙ୍କ ପରିବାର। 

ଏସିଏଫ ସୌମ୍ୟରଞ୍ଜନ ମୃତ୍ୟୁ (Acf Soumyaranjan Death Mystrey) ମାମଲାରେ ପିଆଜ ପାଖୁଡ଼ା ପରି ଖୋଲୁଛି ଗୋଟିକ ପରେ ଗୋଟିଏ ରହସ୍ୟ। ପୁଅ-ବୋହୂ ମଧ୍ୟରେ ବିବାହ ପରେ ହୋଇଥିଲା କଣ୍ଟ୍ରାକ୍ଟ ।ସୌମ୍ୟଙ୍କ ସମସ୍ତ ସମ୍ପତ୍ତି ଉପରେ ପତ୍ନୀଙ୍କ ଅଧିକାର ! ସୌମ୍ୟଙ୍କ ମୃତ୍ୟୁର ମାତ୍ର ୩ଦିନ ପୂର୍ବରୁ ଏହି ରାଜିନାମା କରାଯାଇଥିଲା । ରାଜିନାମା ପରେ କ'ଣ ସୌମ୍ୟଙ୍କୁ ରାସ୍ତାରୁ ହଟାଇ ଦିଆଗଲା ? ଆଉ ଏହା ପଛରେ ଏକ ଭୟଙ୍କର ଷଡ଼ଯନ୍ତ୍ର ଥିବା ସନ୍ଦେହ ନେଇ ବୋହୂ, ଡିଏଫଓ ଏବଂ ରୋଷେୟାଙ୍କ ଲାଇ ଡିଟେକ୍ସନ ଟେଷ୍ଟ ଦାବି କରାଯାଇଛି ।

ଆଜି ସୌମ୍ୟଙ୍କ ବାପା ଅଭିରାମ ମହାପାତ୍ର କଟକରେ ଡିଜିପି ଅଭୟଙ୍କୁ ଭେଟି ଏକ ଦାବିପତ୍ର ଦେଇଛନ୍ତି । ଗୁରୁତର ସୌମ୍ୟଙ୍କୁ ପ୍ରଥମେ ବ୍ରହ୍ମପୁର ଏବଂ ପରେ କଟକ କାହିଁକି ନିଆଗଲା। ସମ୍ପୃକ୍ତ ମହିଳା ଓଆଇସିଙ୍କ ନିର୍ଦ୍ଦେଶରେ ଫରେଷ୍ଟ ଅଫିସ୍ ଆଗରେ ଆମ୍ବୁଲାନ୍ସ (Ambulance) କୁ କାହିଁକି ଘଣ୍ଟାଏ କାଳ ଅଟକା ଯାଇଥିଲା । ଜଣେ ୮୦ ପ୍ରତିଶତ ପୋଡ଼ି ଯାଇଥିବା ଯୁବକଙ୍କୁ ମେଡିକାଲ ନେବା ପରିବର୍ତ୍ତେ କ’ଣ ପାଇଁ ଅଟକାଗଲା, ଏହାର ପୁଙ୍ଖାନୁପୁଙ୍ଖ ତଦନ୍ତ ଦାବି କରିଛନ୍ତି ଅଭିରାମ । ଡିଏଫଓ ଜଣେ ଉଚ୍ଚପଦସ୍ଥ ଅଧିକାରୀ ହୋଇଥିବା ବେଳେ ତଦନ୍ତ ପ୍ରକ୍ରିୟାକୁ ବାଟବଣା କରିବାକୁ ଚେଷ୍ଟା କରିବାର ଆଶଙ୍କା ଥିବାରୁ ପୁଅ ମୃତ୍ୟୁର ଉପଯୁକ୍ତ ତଦନ୍ତ କରି ଦୋଷୀ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ଅଭିରାମ । ଏଥିସହ ନିଜ ଦାବିପତ୍ରରେ ଅଭିରାମ ବୋହୂ ବିଦ୍ୟାଭାରତୀ, ଡିଏଫଓ ସଂଗ୍ରାମ କେଶରୀ ବେହେରା ଏବଂ ରୋଷେୟା ମନ୍ମଥ କୁମ୍ଭଙ୍କ ଲାଇ ଡିଟେକ୍ସନ ଟେଷ୍ଟ ଦାବି କରିଛନ୍ତି।

ଏହି ଘଟଣାର ତଦନ୍ତ ନିଜେ ଡିଜି (Police DG) ମନିଟରିଂ କରିବେ ବୋଲି ପ୍ରତିଶ୍ରୁତି ଦେଇଛନ୍ତି । ଆଜି ବିଦ୍ୟାଭାରତୀଙ୍କୁ ପଚରା ଉଚରା କରିବାକୁ ପାରଳାଖେମୁଣ୍ଡି ଥାନାର ଏକ ୬ ଜଣିଆ ପୋଲିସ ଟିମ୍ ଆଜି ମୟୂରଭଞ୍ଜ କପ୍ତିପଦା ଥାନା ଅଧୀନରେ ଥିବା ଗୌଡ଼ଗାଁରେ ପହଞ୍ଚିଛି । ସେଠାରେ ମୃତ ସୌମ୍ୟଙ୍କ ପତ୍ନୀ ବିଦ୍ୟାଭାରତୀଙ୍କୁ ପଚରାଉଚରା କରାଯାଇଛି।  ସେପଟେ ବାଲେଶ୍ୱରର ଖଇରା ଯାଇ ସୌମ୍ୟଙ୍କ ପରିବାର ଲୋକଙ୍କୁ ମଧ୍ୟ ପଚରାଉଚରା କରିଛି ସ୍ୱତନ୍ତ୍ର ଟିମ୍ । ଗଜପତି ଡିଏଫଓ (DFO Office) କାର୍ଯ୍ୟାଳୟରେ ମଧ୍ୟ ଯାଞ୍ଚ କରିଛି ପୋଲିସ। ସୌମ୍ୟରଞ୍ଜନଙ୍କ ଡ୍ୟୁଟି ସମ୍ପର୍କିତ ଦସ୍ତାବିଜର ମଧ୍ୟ ଯାଞ୍ଚ କରାଯାଇଛି । ପୋଲିସ ଯଦି ନିରପେକ୍ଷ ଭାବରେ ତଦନ୍ତ କରିବ, ତେବେ ନିଶ୍ଚିତ ଭାବରେ ଦୋଷୀ ଧରାପଡ଼ିବେ । ନଚେତ୍ ଆଉ ଅନେକ ମାମଲା ପରି ଇଏ ବି ପୋଲିସ ବିଫଳତାର ଏକ ମୂକସାକ୍ଷୀ ପାଲଟିଯିବ।