ସନ୍ଧ୍ୟାରେ ସ୍ଥଳଭାଗ ଛୁଇଁବ 'ଅମ୍ଫାନ'

ନୂଆଦିଲ୍ଲୀ: ମେ ୨୦ ତାରିଖ ବୁଧବାର ବାଲାଂଦେଶ-ପଶ୍ଚିମବଙ୍ଗ ସୀମାନ୍ତ ସୁନ୍ଦରବନ ଅଞ୍ଚଳରେ ସ୍ଥଳଭାଗ ଛୁଇଁବ ଭୟଙ୍କର ସାମୁଦ୍ରିକ ଝଡରୁ ମହାବାତ୍ୟାରେ ପରିଣତ ହୋଇଥିବା 'ଅମ୍ଫାନ' | ଏନେଇ ଭାରତୀୟ ପାଣିପାଗ ବିଭାଗ (ଆଇଏମଡି) ପକ୍ଷରୁ ପୂର୍ବାନୁମାନ କରାଯାଇଛି | ଉତ୍ତର-ପଶ୍ଚିମ ବଙ୍ଗୋପ ସାଗରର ୧୯.୪୫ ଡିଗ୍ରୀ ଅକ୍ଷାଂଶ ୮୭.୫୨ ପୂର୍ବ ଦ୍ରାଘିମା ମଧ୍ୟରେ ରହିଛି ଏହି ମହାବାତ୍ୟାର ଅବସ୍ଥିତି | ପବନର ବେଗ ଉତ୍ତର-ଉତ୍ତରପଶ୍ଚିମ ବଙ୍ଗୋପ ସାଗରରେ ୨୦୦ କିମି ରହିଛି | ଓଡିଶାର କେତେକ ସ୍ଥାନରେ ଏହାର ପ୍ରାକ୍ ପ୍ରଭାବ ଅନୁଭୂତ ହୋଇଛି | 

ଆଇଏମଡି ପକ୍ଷରୁ ଏନେଇ ମହାବାତ୍ୟାରେ ପ୍ରଭାବିତ ହେବାକୁ ଥିବା ସାମ୍ଭାବ୍ୟ ଅଞ୍ଚଳରେ ଦୋକାନ ବଜାର ବନ୍ଦ କରିବାକୁ ଜଣାଇ ଦିଆଯାଇଛି | ଏହା ସହିତ ସାଧାରଣ ଲୋକଙ୍କ ଚଳପ୍ରଚଳ ଉପରେ ପ୍ରତିବନ୍ଧକ ଲଗାଇବାକୁ କୁହାଯାଇଛି | ଏହା ସହିତ ବିଭିନ୍ନ ସ୍ଥାନରେ ରେଳ ଏବଂ ସଡକ ସଂଯୋଗ ବ୍ୟାହତ ହେବାର ସମ୍ଭାବନା ରହିଥିବା ପାଣିପାଗ ବିଭାଗ କହିଛି | 'ଅମ୍ଫାନ' ମହାବାତ୍ୟାର ମୁକାବିଲା ଲାଗି ପ୍ରସ୍ତୁତ ରହିଛନ୍ତି ଉଭୟ ପଶ୍ଚିମବଙ୍ଗ ଏବଂ ଓଡିଶା ସରକାର |

ଏହାକୁ ଦୃଷ୍ଟିରେ ରଖି ସାମ୍ଭାବ୍ୟ ବାତ୍ୟା ପ୍ରଭାବିତ ଅଞ୍ଚଳର ଲୋକଙ୍କୁ ରିଲିଫ କ୍ୟାମ୍ପକୁ ପଠାଇ ଦିଆଯାଇଛି | ବର୍ତ୍ତମାନ ସମୟରେ ସାମ୍ପ୍ରତିକ କୋରୋନା ସ୍ଥିତିକୁ ଦୃଷ୍ଟିରେ ରଖି ଏପରି ସ୍ଥାନରେ ନିୟୋଜିତ ହୋଇଥିବା ରାଜ୍ୟ ବିପର୍ଯ୍ୟୟ ପ୍ରଶମନ ବାହିନୀର କର୍ମଚାରୀଙ୍କ ସମେତ ଲୋକଙ୍କୁ ମାସ୍କ ଏବଂ ପିପିଇ କିଟ ବଣ୍ଟନ କରାଯାଇଛି |