Summer Diet Tips: ചൂടിനെ ചെറുക്കാൻ ഈ ഭക്ഷണങ്ങൾ മികച്ചത്

സംസ്ഥാനത്ത് വേനൽ ചൂട് കനക്കുകയാണ്. താപനില വർധിക്കുന്ന സാഹചര്യത്തിൽ ദുരന്തനിവാരണ അതോറിറ്റി പൊതുജനങ്ങൾക്കായി നിർദേശങ്ങൾ പുറത്തിറക്കിയിട്ടുണ്ട്. പകൽ 11 മണിക്കും മൂന്ന് മണിക്കും ഇടയിൽ പുറത്തിറങ്ങുമ്പോൾ ജാ​ഗ്രത പുലർത്തണമെന്ന് നിർദേശമുണ്ട്. ചൂട് ക്രമാതീതമായി വർധിക്കുന്ന സാഹചര്യത്തിൽ ഭക്ഷണകാര്യങ്ങളിലും ശ്രദ്ധ പുലർത്തേണ്ടതുണ്ട്. ചൂടിനെ പ്രതിരോധിക്കാൻ സഹായിക്കുന്ന ഭക്ഷണങ്ങൾ ഏതെല്ലാമാണെന്ന് നോക്കാം.

സംഭാരം: ചൂട് കാലത്തെ നിർജ്ജലീകരണം ഇല്ലാതാക്കാൻ സഹായിക്കുന്ന മികച്ച പാനീയമാണ് സംഭാരം. ദഹനം മികച്ചതാക്കാനും കുടലിന്റെ ആരോ​ഗ്യത്തിനും സംഭാരം നല്ലതാണ്.

തണ്ണിമത്തൻ: തണ്ണിമത്തനിൽ 90 ശതമാനം ജലാംശം ഉള്ളതിനാൽ വേനൽക്കാലത്ത് കഴിക്കാവുന്ന മികച്ച ഭക്ഷണമാണിത്. തണ്ണിമത്തൻ കഴിക്കുന്നത് ശരീരത്തിൽ ആവശ്യത്തിന് ജലാംശം നിലനിർത്താനും ശരീരത്തിന് തണുപ്പ് ലഭിക്കാനും സഹായിക്കും. വിറ്റാമിൻ സി, പൊട്ടാസ്യം എന്നിവയുടെ മികച്ച ഉറവിടം കൂടിയാണ് തണ്ണിമത്തൻ.

വെള്ളരിക്ക: വെള്ളരിക്കയിൽ ജലാംശം കൂടുതലും കലോറി കുറവുമാണ്. ഇവ ശരീരതാപനില കുറയ്ക്കുന്നതിനും ശരീരത്തിലെ വിഷ വസ്തുക്കളെ പുറന്തള്ളുന്നതിനും സഹായിക്കുന്നു. സാലഡുകൾ, സ്മൂത്തികൾ എന്നിവയിൽ ചേർത്ത് വെള്ളരിക്ക കഴിക്കാം.

ഇളനീർ: പൊട്ടാസ്യം, സോഡിയം, മഗ്നീഷ്യം തുടങ്ങിയ ഇലക്‌ട്രോലൈറ്റുകളാൽ സമ്പന്നമാണ് ഇളനീർ. ചൂടുകാലത്ത് ശരീരത്തിൽ നിന്നുള്ള ദ്രാവക നഷ്ടം കുറയ്ക്കാനും നിർജ്ജലീകരണം തടയാനും ഇത് സഹായിക്കും.

തൈര്: പ്രോബയോട്ടിക് ഭക്ഷണമായ തൈര് കഴിക്കുന്നത് ശരീരത്തിലെ ചൂട് കുറയ്ക്കാനും കുടലിൻറെ ആരോഗ്യം മികച്ചതാക്കാനും സഹായിക്കും. ചൂട് കാലത്ത് കഴിക്കാവുന്ന മികച്ച ഭക്ഷണമാണ് തൈര്.