വിവാദങ്ങള് സൃഷ്ടിച്ച ഹാദിയ കേസിന്റെ അന്വേഷണം എന്ഐഎ അവസാനിപ്പിച്ചു
ഷെഫിന്റെയും ഹാദിയയുടെയും വിവാഹത്തില് ലൗജിഹാദ് ഇല്ലെന്നും ഇതു സംബന്ധിച്ച് ഇനി കോടതിയില് റിപ്പോര്ട്ടുകള് സമര്പ്പിക്കുന്നില്ലെന്നും എന്ഐഎ വ്യക്തമാക്കി.
ന്യൂഡല്ഹി: ഏറെ വിവാദങ്ങള് സൃഷ്ടിച്ച ഹാദിയ കേസിന്റെ അന്വേഷണം ദേശീയ അന്വേഷണ ഏജന്സി അവസാനിപ്പിച്ചു. നിര്ബന്ധിത മതപരിവര്ത്തനം നടന്നതിന് തെളിവില്ലെന്ന് വ്യക്തമായ സാഹചര്യത്തിലാണ് കേസ് എന്ഐഎ അവസാനിപ്പിച്ചത്.
ഷെഫിന്റെയും ഹാദിയയുടെയും വിവാഹത്തില് ലൗജിഹാദ് ഇല്ലെന്നും ഇതു സംബന്ധിച്ച് ഇനി കോടതിയില് റിപ്പോര്ട്ടുകള് സമര്പ്പിക്കുന്നില്ലെന്നും എന്ഐഎ വ്യക്തമാക്കി. ഹാദിയ കേസ് അന്വേഷിക്കാന് കേരളത്തിലെ 89 മിശ്രവിവാഹങ്ങളില് നിന്നായി തെരഞ്ഞെടുത്ത 11 കേസുകളാണ് എന്ഐഎ പരിശോധനയ്ക്ക് വിധേയമാക്കിയത്.
അന്വേഷണത്തില് ചില പ്രത്യേക ഗ്രൂപ്പുകള് വഴിയാണ് മതപരിവര്ത്തനം നടത്തുന്നതെന്ന് കണ്ടെത്തിയെങ്കിലും ഇത് നിര്ബന്ധിതമാണെന്നതിന് തെളിവ് കണ്ടെത്താനായില്ല.
ഹാദിയയുടെയും ഷെഫിന്റെയും വിവാഹം സുപ്രീംകോടതി അംഗീകരിച്ചതും കണക്കിലെടുത്താണ് എന്ഐഎ കേസ് അവസാനിപ്പിച്ചത്. ഹാദിയയുടെ പിതാവ് അശോകന് കേരള ഹൈക്കോടതിയില് നല്കിയ ഹര്ജിയില് ഹാദിയയുടെയും ഷെഫിന്റെയും വിവാഹം റദ്ദാക്കുകയായിരുന്നു. ഇതിനെ ചോദ്യം ചെയ്ത് ഷെഫിന് സുപ്രീംകോടതിയില് നല്കിയ ഹര്ജിയില് ഹൈക്കോടതി വിധി സുപ്രീംകോടതി റദ്ദാക്കി.
ഇരുവരുടെയും വിവാഹ കാര്യത്തില് ഇടപെടാനാകില്ലെന്നും എന്നാല് ഷെഫിന് ജഹാന് തീവ്രവാദ ബന്ധമുണ്ടെന്നത് സംബന്ധിച്ചും മതപരിവര്ത്തനം നടന്നിട്ടുണ്ടോ എന്നതുമായി ബന്ധപ്പെട്ടും എന്ഐഎ അന്വേഷണം തുടരാമെന്നുമായിരുന്നു സുപ്രീം കോടതി വിധി.
രാജ്യത്ത് ഏതുമതം സ്വീകരിക്കാനും ഭരണഘടന ഉറപ്പുനല്കുന്ന സാഹചര്യത്തില് അന്വേഷണം അവസാനിപ്പിക്കാന് അന്വേഷണ ഏജന്സി തീരുമാനിക്കുകയായിരുന്നു.