Jason Sanjay: വിജയുടെ മകൻ ജെയ്‌സൺ സഞ്ജയ് സംവിധാനം ചെയ്യുന്ന ചിത്രത്തിൽ നായകൻ മലയാളി യുവതാരമെന്ന് റിപ്പോർട്ട്

തമിഴ് നടൻ ദളപതി വിജയുടെ മകൻ ജെയ്‌സൺ സഞ്ജയ് സിനിമാ മേഖലയിലേക്ക് പ്രവേശിക്കുന്നുവെന്ന വാർത്തകൾ വലിയ ആവേശത്തോടെയാണ് ആരാധകർ സ്വീകരിച്ചത്. വരാനിരിക്കുന്ന പ്രോജക്‌റ്റിനെക്കുറിച്ചുള്ള കൂടുതൽ അപ്‌ഡേറ്റുകൾക്കായി ആരാധകർ ആകാംക്ഷയോടെ കാത്തിരിക്കുകയായിരുന്നു.

ചിത്രത്തിൽ മലയാളി യുവതാരം നായകനായി എത്തുമെന്നാണ് പുതിയ റിപ്പോർട്ടുകൾ സൂചിപ്പിക്കുന്നത്. ജെയ്‌സൺ സഞ്ജയ് സംവിധാനം ചെയ്യുന്ന ചിത്രത്തിൽ ദുൽഖർ സൽമാനാണ് പ്രധാന കഥാപാത്രത്തെ അവതരിപ്പിക്കുന്നതെന്നാണ് റിപ്പോർട്ട്. തമിഴ്, തെലുങ്ക്, ഹിന്ദി സിനിമകളിലും തിളങ്ങിയ താരമാണ് ദുൽഖ‍ർ സൽമാൻ.

ജെയ്‌സൺ സഞ്ജയ് ആദ്യമായി സംവിധാനം ചെയ്യുന്ന ചിത്രം പ്രഖ്യാപനം മുതൽ തന്നെ പ്രേക്ഷകർ കാത്തിരിക്കുന്നതാണ്. ചിത്രത്തിലെ അഭിനേതാക്കളുടെയും സാങ്കേതിക വിദഗ്ധരുടെയും കൂടുതൽ വിവരങ്ങൾ ഉടൻ പുറത്തുവരുമെന്നാണ് പ്രതീക്ഷിക്കുന്നത്.

അതേസമയം, ദുൽഖർ സൽമാൻ തൻ്റെ വരാനിരിക്കുന്ന തമിഴ് ആക്ഷൻ ഡ്രാമ ചിത്രമായ തഗ് ലൈഫിൻ്റെ പ്രവർത്തനങ്ങളിലാണ്. മണിരത്‌നം സംവിധാനം ചെയ്യുന്ന ചിത്രത്തിൽ കമൽഹാസൻ ​ഗ്യാസ്റ്റർ വേഷത്തിലാണ് പ്രത്യക്ഷപ്പെടുന്നത്.

രാജ് കമൽ ഫിലിംസ് ഇൻ്റർനാഷണൽ, മദ്രാസ് ടാക്കീസ്, റെഡ് ജയൻ്റ് മൂവീസ് എന്നിവ ചേർന്നാണ് ചിത്രം നിർമിക്കുന്നത്. കമൽഹാസൻ, ദുൽഖർ സൽമാൻ, ജയം രവി, തൃഷ, അഭിരാമി, നാസർ, ഗൗതം കാർത്തിക്, ജോജു ജോർജ്, ഐശ്വര്യ ലക്ഷ്മി എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്.

2022 നവംബറിൽ കെഎച്ച്234 എന്ന താൽക്കാലിക നാമത്തിൽ ചിത്രം ഔദ്യോഗികമായി പ്രഖ്യാപിച്ചു. ഇത് കമൽഹാസൻ്റെ 234-ാമത്തെ ചിത്രമാണ്. എ ആർ റഹ്മാനാണ് ചിത്രത്തിന്റെ സംഗീതസംവിധാനം നിർവഹിച്ചിരിക്കുന്നത്. ഛായാഗ്രഹണം രവി കെ ചന്ദ്രൻ കൈകാര്യം ചെയ്യുന്നു. എഡിറ്റിംഗ് എ ശ്രീകർ പ്രസാദ്.