Ind vs Eng: ഇംഗ്ലണ്ടിനെ അടിച്ച് തൂഫാനാക്കി; സർഫറാസ് ഖാന്റെ വിജയരഹസ്യം ഇതാണ്

നീണ്ട കാത്തിരിപ്പിനൊടുവിൽ ഇന്ത്യൻ ടീമിൽ ഇടംനേടാനും അരങ്ങേറ്റ മത്സരത്തിൽ തന്നെ മിന്നും പ്രകടനം പുറത്തെടുക്കാനും കഴിഞ്ഞതിന്റെ ആവേശത്തിലാണ് സർഫറാസ് ഖാൻ. മൂന്നാം ടെസ്റ്റിന്റെ രണ്ട് ഇന്നിംഗ്‌സുകളിലും അർദ്ധ സെഞ്ച്വറികൾ നേടിയാണ് സർഫറാസ് ഖാൻ ടീമിലേയ്ക്കുള്ള വരവറിയിച്ചത്. ഇംഗ്ലണ്ടിന്റെ സ്പിന്നർമാരെ നിസാരമായി അതിർത്തി കടത്തിയ സർഫറാസ് ഖാന്റെ മാജിക്കിന് പിന്നിൽ ഒരു വലിയ രഹസ്യമുണ്ട്. 

നീണ്ട 15 വർഷത്തെ കഠിനാധ്വാനത്തിനൊടുവിലാണ് സർഫറാസ് ഖാന് തന്റെ സ്വപ്‌നം സാക്ഷാത്കരിക്കാനായത്. ഇതിനായി എല്ലാ ദിവസവും നെറ്റ്‌സിൽ സർഫറാസ് കഠിനമായി പരിശീലിച്ചു. ഒരോ ദിവസവും നെറ്റ്‌സിൽ 500 വീതം പന്തുകളാണ് സർഫറാസ് നേരിട്ടിരുന്നത്. ഇതിനെല്ലാം മേൽനോട്ടം വഹിച്ചത് അദ്ദേഹത്തിന്റെ പിതാവായ നൗഷാദ് ഖാനായിരുന്നു. 

ആഭ്യന്തര ക്രിക്കറ്റിൽ നിരന്തരമായി പ്രതിഭ തെളിയിച്ചിട്ടും ഇന്ത്യൻ ടീമിലേയ്ക്ക് ക്ഷണം ലഭിക്കാൻ സർഫറാസിന് ഏറെക്കാലം കാത്തിരിക്കേണ്ടി വന്നു. ആഭ്യന്തര ക്രിക്കറ്റിലും പിതാവിന്റെ 'മാച്ചോ ക്രിക്കറ്റ് ക്ലബ്ബി'ലും പയറ്റിത്തെളിഞ്ഞാണ് സർഫറാസിന്റെ വരവ്. സമീപ വർഷങ്ങളിലാണ് സർഫറാസ് ഏറ്റവും മികച്ച ഫോമിലേയ്ക്ക് എത്തിയത്. കോവിഡ് കാലത്തും പരിശീലനം മുടക്കാതെ തന്റെ ആവനാഴിയിലെ അസ്ത്രങ്ങൾക്ക് മൂർച്ഛ കൂട്ടുന്നതിലായിരുന്നു സർഫറാസിന്റെ ശ്രദ്ധ. ഇക്കാലത്ത് ഓഫ് സ്പിന്നർമാരെയും ലെഗ് സ്പിന്നർമാരെയും ഇടംകയ്യൻ ഓപ് സ്പിന്നർമാരെയുമെല്ലാം എങ്ങനെ നേരിടണമെന്ന് സർഫറാസ് മനസിലാക്കി. രാജ്‌കോട്ടിൽ ടോം ഹാർട്‌ലി, ജോ റൂട്ട്, റെഹാൻ അഹമ്മദ് എന്നിവരെ ബൗണ്ടറി കടത്താൻ സർഫറാസിന് സഹായകരമായതും ഇതേ കഠിനപ്രയത്‌നം തന്നെയാണ്.