ఇల్లు అద్దెకు తీసుకున్న పవర్ స్టార్ పవన్ కల్యాణ్

సినీనటుడు, పవర్ స్టార్ పవన్ కల్యాణ్ హైదరాబాద్ నుంచి విజయవాడకు మకాం మార్చారు. ఆంధ్రప్రదేశ్‌లో పోరుబాట యాత్ర చేపట్టి, అక్కడి రాజకీయాలపైనే అధికంగా దృష్టి సారిస్తున్న జనసేనాని పార్టీ కార్యకలాపాలకు వీలుగా ఉంటుందని విజయవాడలోనే ఓ ఇంటిని తాత్కాలికంగా అద్దెకి తీసుకున్నారు. పటమటలంకలో తీసుకున్న అద్దె ఇంట్లోకి సతీసమేతంగా శుక్రవారం ఉదయం గృహప్రవేశం చేసిన పవన్ కల్యాణ్... అనంతరం కొత్త ఇంట్లో ప్రత్యేక పూజలు నిర్వహించారు. రాజకీయ కార్యక్రమాలను దృష్టిలో పెట్టుకుని ఈ ఇంట్లోకి మారిన పవన్ కల్యాణ్.. పార్టీ సమావేశాలు, మీడియా సమావేశాలు నిర్వహించేందుకు వీలుగా ఇంట్లో ఏర్పాట్లు చేసుకున్నారు. 

శనివారం నుంచి రెండు రోజుల పాటు పవన్ విజయవాడలోనే పర్యటించనున్న సంగతి తెలిసిందే. అనంతరం నేరుగా విశాఖపట్నం వెళ్లి అక్కడ మళ్లీ మలివిడత పోరుయాత్రలో పాల్గొంటారని జనసేనవర్గాలు రెండు రోజుల క్రితమే ఓ ప్రకటన విడుదల చేసిన సంగతి తెలిసిందే. 

ఇదిలావుంటే, నాగార్జున యూనివర్శిటీకి సమీపంలోని కాజ గ్రామంలో పవన్ కొనుగోలు చేసిన రెండు ఎకరాల భూమిలో ఆయన సొంత ఇల్లు, జనసేన పార్టీ కార్యాలయం నిర్మాణం జరుగుతోంది. అయితే అక్కడి నిర్మాణం ఇంకొంత ఆలస్యమయ్యే అవకాశం ఉండటంతో అప్పటివరకు తాత్కాలిక అవసరాల కోసం పవన్ పటమటలంకలో ఈ ఇంటిని అద్దెకు తీసుకున్నట్టు జనసేనవర్గాలు చెబుతున్నాయి.