Salaar Trailer: ప్రభాస్ సలార్ ట్రైలర్ వచ్చేసింది.. బాక్సాఫీస్ షేక్ అవ్వడం ఖాయం

Salaar Trailer Review: సినీ ప్రేక్షకులు ఎప్పుడు అని ఎదురుచూస్తున్న ప్రభాస్ సలార్ ట్రైలర్ వచ్చేసింది. కేజీఎఫ్ సిరీస్‌తో పాన్ ఇండియా లెవల్లో బ్లాక్ బస్టర్ అందుకున్న దర్శకుడు ప్రశాంత్ నీల్ ప్రభాస్ తో సినిమా చేస్తున్నారు అనగానే ఈ చిత్రంపై అంచనాలు భారీగా పెరిగిపోయాయి. ఇక ఈ సినిమా నుంచి వచ్చే చిన్న అప్డేట్ కూడా ప్రేక్షకులలో విపరీతమైన క్రేజ్ సంపాదించుకుంటూ వచ్చింది. ఈ నేపథ్యంలో ఈరోజు విడుదలైన సినిమా ట్రైలర్ ఈ చిత్రంపై అంచనాలను ఆకాశాన్ని తాకేలా చేసింది.

ప్రశాంతి నీల్ ఈ మధ్య తన ఇంటర్వ్యూలో చెప్పినట్టే ఈ ట్రైలర్ చూస్తే కూడా ఇది ఇద్దరి ఫ్రెండ్స్ మధ్య జరిగే సినిమా అని అర్థమయిపోతోంది. అంతేకాదు కేజీఎఫ్ సిరీస్‌లో అమ్మ సెంటిమెంట్‌తో గుండెల్ని హత్తుకున్న ప్రశాంత్ నీల్ ఈసారి సలార్‌సో ఫ్రెండ్‌షిప్‌ను తీసుకువచ్చాడు. ఇక సలార్ పార్ట్ 1 సీజ్‌ఫైర్ ట్రైలర్  మొదట్లోనే ఇద్దరు చిన్నారుల మధ్య స్నేహాన్ని చూపిస్తూ ట్రైలర్ ని స్టార్ట్ చేశాడు ప్రశాంత్. రేయ్ నీకోసం ఎర అయినా అవుతా సొర అయినా అవుతా.. నువ్వెప్పుడు పిలిస్తే అప్పుడు వస్తా.. అంటూ చిన్నప్పడు వరదరాజ్ (పృథ్వీరాజ్‌)కి మాటిచ్చి దూరంగా వెళ్లిపోతాడు దేవ (ప్రభాస్). 

ఇక అక్కడి నుంచి మొదలవుతుంది అసలు ఆట. కేజిఎఫ్ లాగానే మనకు ఒక సామ్రాజ్యాన్ని చూపించడం ఆ సామ్రాజ్యానికి అధిపతి అయిన రాజ మన్నార్ (జగపతి బాబు) తన కొడుకు వరదరాజుని తన తర్వాత అక్కడ కుర్చీలో కూర్చో పెట్టాలని చూడడం.. ఇక ఆ కుర్చీ కోసం ఎంతోమంది పన్నాగాలు పడడం.. ఇలా కొనసాగిస్తూనే ఈ ట్రైలర్లు జగపతి బాబు, బాబీ సింహా, శ్రియా రెడ్డి, కేజీఎఫ్ గరుడ క్యారెక్టర్లను పరిచయం చేశారు. 

కాగా దాదాపు రెండు నిమిషాల ట్రైలర్ అయ్యాక అప్పుడు ఒక సూపర్ ఎలివేషన్ తో ప్రభాస్ క్యారెక్టర్ ని దింపి గూడ్స్ బంప్స్ తెప్పించారు ప్రశాంత్ నీల్. తన స్నేహితుడు వరదరాజుని పట్టుకొని హింసలు పెడుతూ ఉండగా ..అప్పుడు సామ్రాజ్యాన్ని కాపాడుకొని దానికి అధిపతి అవ్వాలని తన చిన్ననాటి స్నేహితుడు దేవకి కబురు చేస్తాడు వరద. ఇక సూపర్ యాక్షన్ సీక్వెన్స్‌తో ప్రభాస్ ఎంట్రీ ఇస్తారు. ఇక్కడ ఈ ట్రైలర్ ఒక రేంజ్కి వెళ్ళిపోయింది. అలానే విలన్లతో ప్రభాస్ చేసిన పోరాటాలు అదిరిపోయాయి. ఇక తన ఫ్రెండ్‌కి సామ్రాజ్యాన్ని అప్పగించడానికి ప్రభాస్ చేసిన పోరాటమే సలార్ పార్ట్ 1 సీజ్ ఫైర్ స్టోరీ అని క్లియర్‌గా అర్థమైపోతుంది.

ఇక అక్కడితో ఆగలేదు.. ప్రశాంత్ నీల్ టేకింగ్ స్టైల్ తో లాస్ట్ లో ప్రభాస్ తో చెప్పిచ్చిన డైలాగ్ స్ కి విజిల్స్ వేయడం ఖాయం. ఐ కైండ్లీ రిక్వెస్ట్ ప్రభాస్ డైలాగ్ తో ఈ ట్రైలర్ కి ముగింపు పలికిన ప్రశాంత్ ఇక థియేటర్స్ లో అసలు యాక్షన్ మొదలు పెట్టబోతున్నారని అర్థమయిపోయింది. ఈ సినిమాలో ప్రభాస్ సరసన శృతిహాసన్ హీరోయిన్గా చేస్తుండగా ఈ చిత్రాన్ని హొంబలే ఫిల్మ్స్ బ్యానర్ పై విజయ్ కిరగందూర్ నిర్మిస్తున్నారు.

స్థానికం నుంచి అంతర్జాతీయం వరకు.. క్రీడలు, వినోదం, రాజకీయాలు, విద్య, ఉద్యోగాలు, హెల్త్, లైఫ్‌స్టైల్ .. A to Z అన్నిరకాల వార్తలను తెలుగులో పొందడం కోసం ఇప్పుడే Zee తెలుగు న్యూస్ యాప్ డౌన్‌లోడ్ చేసుకోండి.