వచ్చాడయ్యో సామి సాంగ్.. ట్రెండింగ్ వీడియో..

భరత్ అనే నేను సినిమా విడుదలకు మరో రెండు వారాలే మిగిలి వుండటంతో సినిమా యూనిట్ ప్రమోషన్స్‌తో బిజీ అయ్యింది. ఇటీవల కాలంలో వరుసగా విడుదలవుతున్న పోస్టర్స్, పాటలు, టీజర్ వీడియోలకు అభిమానుల నుంచి భారీ స్పందన కనిపిస్తోన్న నేపథ్యంలోనే తాజాగా ఈ సినిమా నుండి ముచ్చటగా మూడో పాటను విడుదల చేశారు. " వచ్చాడయ్యో సామి " అంటూ సాగే ఈ పాటని తెలుగు వారికి సుపరిచితుడైన ఉత్తరాది నేపథ్యగాయకుడు కైలాష్ ఖేర్, దివ్య కుమార్ పాడారు. దేవి శ్రీ ప్రసాద్ కంపోజిషన్‌లో రూపొందిన ఈ పాట సంగీత ప్రియుల నుంచి మంచి స్పందన కనిపిస్తోంది. యూట్యూబ్‌లో రిలీజైన తొలి నాలుగైదు గంటల్లోనే ఈ పాట 2 మిలియన్ల వ్యూస్ సొంతం చేసుకోవడం విశేషం.

ఇక పాటలో మహేష్ బాబు పంచెకట్టులో కనిపించడం ఈ పాటపై క్రేజ్ పెరగడానికి మరో కారణమైంది. కొరటాల శివ డైరెక్ట్ చేసిన ఈ సినిమా ఏప్రిల్ 20వ తేదీన ఆడియెన్స్ ముందుకు రానుంది. మహేష్ బాబు సరసన 'ఎం.ఎస్. ధోనీ' ఫేమ్ కైరా అద్వానీ జంటగా నటించింది. శరత్ కుమార్, ప్రకాష్ రాజ్, దేవరాజ్, పోసాని కృష్ణమురళి ఇతర ముఖ్యమైన పాత్రలు పోషించారు. మహేష్ బాబు ఈ సినిమాలో ముఖ్యమంత్రి పాత్రలో కనిపించనున్న సంగతి తెలిసిందే.